Dostlar, bu gün daha bir tarixçi alimimizin elmi uğurunun sevincini sizinlə bölüşmək istəyirəm. AMEA A.Bakıxanov adına Tarix İnstitutunun “Beynəlxalq Əlaqələr” şöbəsinin əməkdaşı, alim adını əslində artıq çoxdan təsdiq etmiş bir həmkarımıza – Nigar Gözəlovaya tarix üzrə elmlər doktoru elmi dərəcəsi haqda AAK-nın diplomu təqdim olunub. 
  Nigarın adını ilk dəfə neçə illər əvvəl xaricdə, iranşünasların beynəlxalq konfransında eşitmişdim. Bakıdan olduğumu bilib məndən Nigar xanımın da konfransa gəlib-gəlmədiyini soruşanda ağlıma başqa bir tarixçi Nigar xanım gəlmişdi. Gözəlova soyadı o vaxt mənə heç nə demədiyindən Vətənə qayıdandan sonra bu adla maraqlanmış və bizdən xeyli gənc həmkarımızın artıq onlarla beynəlxalq konfranslarda iştirak etdiyini, ciddi alim kimi nüfuz qazandığını öyrənmişdim. Sonralar Nigar Gözəlova ilə birlikdə Rusiyada, Türkiyədə, İspaniyada ən yüksək statuslu elmi konfranslarda iştirak edəndə, Nigarın bir neçə dildə - rus, ingilis, türk - səlis məruzələrinin, elmi diskussiyalarda fəal iştirakının, xarici həmkarları ilə rahatlıqla elmi ünsiyyət yaratması, sözün geniş mənasında Azərbaycan elmini xaricdə ləyaqətlə təmsil etməsinin şahidi olmuşam. Nigarın nüfuzlu xarici elmi jurnallarda ingilis və rus dillərində dərc olunan əsərləri, bir sıra beynəlxalq layihələrində yaxından iştirakı, Oksford kimi məşhur universitetə çoxmüddətli elmi ezamiyyəti, tanınmış Amerika və Avropa alimləri ilə əməkdaşlığı və bu sıradan digər nümunələri ölkəmizin elmi mühitində yeni nəsil tarixçilərin yetişdiyinin sübutu kimi qəbul etmişəm və bütün elmimiz üçün fərəh duymuşam.    
   Daha sonralar, Nigar Gözəlovanın elmi maraqlarının yalnız öz fərdi araşdırmaları – XVIII-XIX əsr Azərbaycan tarixi, beynəlxalq əlaqələri, bu dövrün tarixi şəxsiyyətləri – mövzuları ilə məhdudlaşmadığı, yaxın tariximiz üçün aktual olan məsələlər üzrə elmi ədəbiyyatın ingilis və rus dillərindən tərcüməsi, elmin təşkili (xarici alimlərlə əlaqələrin yaradılması, beynəlxalq konfransların təşkili və s.)  tarixi maarifləndirmə (müxtəlif auditoriyalarda kütləvi məruzələr, televiziya kanallarında çıxışlar və s.) sahələrində fəallığını görəndə  bütün bunları sıralarımıza yalnız professional tarixçi alimin deyil, həm də Tarix elmimizin fədakar bir nümayəndəsinin gəlişi kimi qiymətləndirmişəm. Odur ki, Nigarın bu gün layiq olduğu elmlər doktoru diplomunu alması mənim üçün çoxdan gözlənilən və bu alimin nəhayət ki, əsl dəyəri verilən bir hadisədir.
    Bu sonuncu ifadəmi bir qədər açıqlamaq istərdim, çünki bu layiq olduğu elmi dərəcəyə Nigar, çoxlarından fərqli olaraq, rahat yolla yetişməyib. Belə ki, elmi işinin müdafiəsi önünə çalışdığı  akademik institutda çəkilən süni, qərəzli maneələrdən, hər növbəti mərhələdən sonra ən müxtəlif instansiyalara göndərilən adlı-adsız məktublar, böhtanlar, yoxlamalar və s., bütün bu elmə yaraşmayan, bəzi nalayiq insani xislətlərin törəməsi olmaqla sonsuz vaxt və əsəb itkisi ilə müşayiət olunan uzun proseslərdən keçdikdən sonra, Nigar Gözəlovanın indi öz haqqını alması ikiqat sevindirici hadisədir. Və təbii ki, bu nailiyyət, Nigarı bir alim və yüksək insani, mənəvi-əxlaqi  keyfiyyətlərə malik xanım kimi qiymətləndirən həmkarları və dostları tərəfindən həm də, elmə sağlam yanaşmanın nəhayət ki, qalib gəlməsi hadisəsi kimi qəbul edilir. Bu baxımdan mən, Tarix İnstitutunun Müdafiə Şurasında özümün də iştirakçısı olduğum 6 saatlıq çox gərgin bir şəraitdə keçən müdafiə prosesində Nigar Gözəlovaya əsl alim kimi dəstək vermiş rəsmi opponentləri, böyük alimlərimiz – ilk növbədə Ustadımız, akademik Nailə xanım Vəlixanlıya,  elmlər doktorları, professorlar İsmayıl Musayevə, Zabil Bayramova və Emin Şıxəliyevə, həmçinin bütün törədilən fəsadların fövqündə duraraq bir alimin həqiqi elmi nailiyyətini təsdiq etmiş AAK sədri Famil Mustafayevə və Elmi Şura üzvlərinə Azərbaycan elminin təəssübünü çəkən tarixçilər və ümumən alimlərimiz adından təşəkkür edirəm.
    Nigar üçün bu gözəl sevindirici gündə bu sətirləri yazmaya bilməzdim. Çünki elmi məkanımızın elmdən uzaq çox-çox dəyərsiz “alimlərlə” doldurulduğu bir zamanda  uzun onilliklər elm sahəsində çalışan, universitetdə dərs deyən, tələbələr yetişdirən, böyük uğurları, beynəlxalq nüfuzu göz qabağında olan bir alimin qarşısına məhz bu nüfuz və uğurlara görə süni sədlər çəkilməsi onsuz da tənəzzül dövrünü yaşayan tarix elmimiz üçün utanc gətirən hal idi.
    Nigar Gözəlovanı bir daha özümün və onun elmi uğuruna sevinən bütün həmkarlarımın adından təbrik edirəm. 
    Elm adına yeni nailiyyətlər, Azərbaycan elmini xarici elmi məkanlarda daha yüksək kürsülərdə təmsil etmək və nüfuzunu qaldırmaq işində əvvəlki kimi fədakarlıq və həvəslə çalışmaq arzusu ilə !