Bu gün Avropa İttifaqının Azərbaycan nümayəndəliyi 8 Mart Beynəlxalq Qadınlar Günü münasibətilə bir ay sürəcək “Güc təcəssüm etdirən qadınlar” adlı kampaniya başladıb.“Gənclik” ticarət mərkəzində ictimaiyyət üçün 15 mart tarixinədək nümayiş etdiriləcək  interaktiv guşədə baş tutmuş tədbirin açılışında Avropa İttifaqının, həmçinin Avropa İttifaqına üzv ölkələrin Azərbaycandakı səfirləri, ölkənin tanınmış qadınları iştirak ediblər.

Kampaniyanın açılışında çıxış edən Avropa İttifaqının Azərbaycan Respublikasındakı səfiri Petr Mixalko bildirib ki, bu kampaniyanın ismarışı qadın gücünü açıq şəkildə etiraf etməkdir: “Avropa İttifaqı Beynəlxalq Qadınlar Gününü müxtəlif sahələri təmsil edən 20-dən çox Azərbaycan qadını ilə birlikdə qeyd etməkdən qürur hissi keçirir: “Məqsədimiz bütün nəsilləri şövqə gətirmək və qadını güclü edən cəhətlər mövzusunda müzakirələr aparmaqdır. Avropa İttifaqı həyata keçirdiyi siyasət və proqramlar vasitəsilə cəmiyyətin bütün sahələrində qadınların tam iştirak edə bilmələrinə, həmçinin qadınlar üçün təhsil və məşğulluq imkanlarının artırılmasına şərait yaratmaq məqsədinə qulluq edir”.

Səfir  qeyd edib ki, BMT-nin dayanıqlı inkişaf hədəflərinə görə, hazırkı templə proses davam edərsə, gender bərabərliyi üçün 286 il lazımdır: “Gəlin, bunun üçün 286 il gözləməyək, bu istiqamətdə hədəfimizə çatmaq üçün indi səylə çalışaq”. Kampaniyanın simaları idman, təhsil, mədəniyyət, aviasiya, səhiyyə və təhlükəsizlik sahələrində çalışan qadınları əhatə etməkdədir. 

Qeyd olunub ki, kampaniya çərçivəsində “ASAN Radio” 100 FM dalğasında yayımlanan “Avropada ASAN” silsilə verilişlərinin birinin qadınlara həsr edilməsi, universitetlərdə təqdimatların keçirilməsi kimi müxtəlif tədbirlər baş tutacaq.

X.İsmayıl