Məlum olduğu kimi, Azərbaycan xalqının Ümummilli Lideri, müstəqil Azərbaycan dövlətinin qurucusu, görkəmli siyasi və dövlət xadimi Heydər Əliyevin anadan olmasının 100 illik yubileyi ilə əlaqədar Möhtərəm Prezidentimiz İlham Əliyev tərəfindən 2023-cü ilin “Heydər Əliyev İli” elan edilməsinə dair imzalanmış Sərəncam respublikamızın bütün vətəndaşları tərəfindən hədsiz sevinc hissi ilə qarşılanıb.

Bu Sərəncam həm də dünya miqyaslı siyasi xadimin milli dövlətçilik ənənələrimizin dirçəldilməsi, yaşadılması və bərpa edilməsi sahəsində misilsiz xidmətlərinə, çağdaş tariximizdə tutduğu müstəsna mövqeyinə xalqımızın və dövlətimizin qədirbilən münasibətinin növbəti parlaq təcəssümü kimi dəyərləndirilməlidir.
Müstəqil Azərbaycan Respublikasının tərəqqisində, ən əsası, qalib ölkə kimi beynəlxalq aləmdə tanınmasında Ulu Öndərin misilsiz rolu və xidmətləri şəksizdir. Bugünkü Azərbaycanın reallıqları Heydər Əliyev siyasətinin bariz təntənəsidir. 2023-cü ilin Azərbaycanda “Heydər Əliyev İli” elan edilməsi isə bu dahi şəxsiyyətin fəaliyyətinin ayrı-ayrı istiqamətlərinin daha dərindən araşdırılması, zəngin irsinin əhatəli şəkildə təbliği üçün geniş imkanların yaradılmasına hesablanıb.
Azərbaycana rəhbərliyinin birinci dövründə Heydər Əliyevin böyük idarəçilik bacarığı və yüksək vətənpərvərliyi sayəsində respublikamızda qısa müddət ərzində sosial-iqtisadi, elmi-texniki və mədəni sahələrin inkişafında böyük nailiyyətlər əldə olunub.
Möhkəm siyasi iradəyə, sarsılmaz əqidəyə malik olan Ulu Öndər Heydər Əliyevin tükənməz dövlət idarəçiliyi istedadı onun SSRİ-nin rəhbərlərindən biri kimi çalışdığı və irimiqyaslı layihələr həyata keçirdiyi illərdə özünü bir daha parlaq surətdə təzahür etdirib.
Ümummilli Lider bütün varlığı ilə sevdiyi və canından əziz bildiyi doğma Azərbaycan xalqının mənafeyini həmişə önə çəkərək, respublikamızın malik olduğu bütün imkanlardan onun tərəqqisi üçün istifadə edib.
Ədliyyə Nazirliyinin əsaslı surətdə təsis olunması da məhz Ümummilli Lider Heydər Əliyevin Azərbaycana birinci rəhbərliyi dövrünə təsadüf edir. Belə ki, 1970-ci il oktyabrın 27-də Azərbaycan SSR Ali Sovetinin qərarı ilə təsis olunmuş Ədliyyə Nazirliyinin sabit fəaliyyətinin təmin edilməsi məqsədilə məhkəmə orqanlarına təşkilati rəhbərlik həyata keçirilib, əhaliyə göstərilən hüquqi yardım keyfiyyətcə xeyli  yaxşılaşdırıb, notariat fəaliyyətinin və məhkəmə ekspertizalarının aparılmasını təmin edilib, son nəticədə isə ədliyyə işinin gələcək inkişafı üçün əlverişli zəmin yaradılıb.
Heydər Əliyevin nəzərində dövlətçilikdə haqq-ədalətin qorunması, ona düzgün əməl olunması, o cümlədən ədliyyə işi birinci dərəcəli vəzifə idi. Elə bunun nəticəsində Ədliyyə Nazirliyinin yaranmasından cəmi bir ay keçməsinə baxmayaraq 1970-ci il noyabrın 17-də Azərbaycan SSR Ali Sovetinin Rəyasət Heyəti xalq məhkəmələrinin seçicilər qarşısında hesabatlarının vəziyyəti və hüquqi biliklərin əhali arasında təbliği barədə qərar qəbul etdi.
Ulu Öndər hüquqi biliklərin təkcə zəhmətkeşlər arasında təbliğ olunması ilə bu sahədə əsaslı dəyişikliklərin baş verməyəcəyini yaxşı bilirdi. Bunlar ancaq başlanğıc üçün lazım idi. Əsas məsələlərdən biri də ali və orta ixtisas məktəblərində hüququn əsaslarının tədrisi və öyrənilməsi idi. Ona görə də, məhz Heydər Əliyevin təşəbbüsü, ideya müəllifliyi və səyləri ilə “Zəhmətkeşlərin hüquqi tərbiyəsini yaxşılaşdırmaq tədbirləri haqqında” qərar layihəsi hazırlanaraq 1970-ci il dekabrın 4-də Azərbaycan Kommunist Partiyası Mərkəzi Komitəsində müzakirə olunduqdan sonra qəbul olundu.
Bu qərarda ali və orta ixtisas məktəblərində hüququn əsaslarının tədrisi və öyrənilməsi işini yaxşılaşdırmaq, tədris müəssisələri vasitəsilə hüquqi biliklərin təbliğini gücləndirmək, qanunvericiliyin ən aktual məsələlərinin gənc nəslə öyrədilməsinə, şərh olunmasına, hüquq qaydalarının möhkəmləndirilməsinə və dövlət mülkiyyətinin qorunmasına yönəldilən kütləvi siyasi tədbirlərin keçirilməsi sahəsində tədbirlər planı hazırlamaq tələbi nəzərdə tutulurdu.
Ümummilli Liderin təşəbbüsü və rəhbərliyi ilə qəbul olunmuş bu qərar XX əsrin 70-ci illərinin sosial ictimai-mənəvi gerçəkliklərinə, o dövrün aşınmış partiya-sovet təsərrüfat elitasının özbaşınalığına, bürokratçılığa, inzibati amirlik sisteminin digər tipik təzahür formalarına qarşı kəskin etiraz və düşünülmüş müdrik tədbirlər planının bir hissəsi idi. Bu qərar bütün respublikada əks-səda doğurmuş, onun nəzərdə tutduğu müddəaları həyata keçirmək üçün ölkədə kompleks tədbirlər planı hazırlanıb həyata keçirilmişdi. 
Ulu Öndər məhkəmə-ədliyyə sahəsində inkişaf etmiş mütərəqqi ölkələrin məhkəmə-hüquq təcrübəsinin öyrənilməsi və cəmiyyətimiz üçün məqbul sayılan qanun və hüquq normalarının Azərbaycanda tətbiq olunması məsələsinə də xüsusi diqqət yetirirdi.
Ulu Öndər Heydər Əliyev ikinci dəfə ölkə rəhbərliyinə gəldikdən sonra ədliyyə orqanlarının işinin müasir tələblər səviyyəsinə qaldırılması üçün əsaslı tədbirlər həyata keçirilib, Ədliyyə Nazirliyinin cəmiyyətdə rolu və əhəmiyyəti artıb, səlahiyyət dairəsi genişlənib.
Ədliyyə işçilərində və hakimlərdə mənəvi stimul yaradılması məqsədi ilə onların peşə bayramı gününün müəyyən edilməsinə təşəbbüs göstərilərək 22 noyabr - 1918-ci ildə Azərbaycan Demokratik Respublikası Ədliyyə Nazirliyinin Əsasnaməsinin təsdiq edildiyi günün ədliyyə işçilərinin peşə bayramı günü kimi təsis edilməsi üçün dövlət başçısına müraciət edilib və Ümummilli Lider Heydər Əliyevin 2000-ci il 11 noyabr tarixli Sərəncamı ilə 22 noyabr ədliyyə işçilərinin peşə bayramı günü kimi müəyyən edilib. O gündən ədliyyə işçiləri öz peşə 
Ümummilli Lider Heydər Əliyev tərəfindən ədliyyə orqanlarının, prokurorluq və vəkillik təsisatlarının müasir dövrün tələbləri səviyyəsində qurulması, müstəqil məhkəmə hakimiyyətinin formalaşdırılması və yerli demokratiyanın bərqərar olunması, hüquqşünas kadrların yetişdirilməsi ilə bağlı apardığı islahatlar, insan hüquqlarının müdafiəsi sahəsində həyata keçirdiyi tədbirlər nəticəsində əhalinin hüquqi təsisatlara və hüquqi yardıma tələbatının ödənilməsi, yeni nəsil hakim və hüquqşünasların formalaşdırılması, məhkəmələrin müstəqilliyinin və məhkəmələrə inamın artırılması üçün geniş imkanlar açıb.
Ulu Öndərin hüquqi islahatlar kursunu müasir dövrün tələblərinə uyğun yeni çalarlarla zənginləşdirən ölkə Prezidenti cənab İlham Əliyevin son dövrlərdə imzaladığı məqsədyönlü Fərman və sərəncamlarla, qəbul etdiyi praqmatik qərarlarla, həyata keçirdiyi islahatlarla inkişaf mexanizminin daha da çevikliyinə nail olunub. Məhz bu iki müdrik siyasətçinin dövlətçilik təcrübəsinin nəticəsi olaraq bu gün Azərbaycan bir çox göstəricilər üzrə nəinki postsovet məkanında, eləcə də bütün dünyada nümunə göstərilir.
Bu gün tarix Heydər Əliyevin dövlətçilik strategiyasının nə qədər effektiv və uzaqgörən olmasını bir daha sübut edir. Əminliklə deyə bilərik ki, biz hələ uzun bir tarixi dövr ərzində Heydər Əliyev kursunun dəyərinin, davamlılığının, onun xalqımızın və milli dövlətçiliyimizin taleyində oynadığı əvəzsiz rolun şahidi olacağıq.
                                                                                             

Əzizulla ŞÜKÜROV,
Lənkəran Rayon Qeydiyyat Şöbəsinin rəisi.