BOKS

------------------

Daha üç boksçumuz AÇ-yə qələbə ilə başlayıb və mərhələ aşıb

Monteneqronun Budva şəhərində 22 yaşadək boksçular arasında  keçirilən Avropa çempionatı davam edir. Yarışın ikinci günündə Azərbaycan millisinin daha 3 idmançısı rinqə çıxaraq, mübarizəyə qatılıb və hər üç təmsilçimiz döyüşünü qələbə ilə bitirərək növbəti mərhələyə adlayıb. 

Rinqə çıxan triomuzdan biri - Avropa çempionumuz Nicat Hüseynov (51 kq)  ilk görüşündə Françesko Messineo (Almaniya) ilə qarşılaşmada  inamlı qələbə qazanıb – 5:0 (29:28, 30:27, 30:27, 30:27, 30:27). O, 1/4 finalda ilk mərhələdən azad olan italiyalı Fares Al-Assi ilə döyüşəcək. Həmin döyüş isə noyabrın 16-da olacaq.

Günün triosunda yer alan digər boksçumuz - Avropa çempionatının finalçısı Ruslan Qədirov (54 kq) isə mübarizəyə qatıldığı 1/8 finalda Tommaso Skiaccanı (İtaliya) 3:2 (29:28, 29:28, 29:28, 28:29, 28:29) hesabla üstələyib. Qədirov noyabrın 16-da baş tutacaq 1/4 finalda türkiyəli Kaya Canla qarşılaşacaq.

Günün daha bir qəhrəmanı - 60 kq-da Maqsud Xasmetova gəlincə, o, start döyüşündə Berat Çiveleki (Türkiyə) mübarizədən kənarlaşdırıb - 5:0 (29:28, 29:28, 29:28, 29:28, 29:28). O, noyabrın 14-də 1/8 final çərçivəsində irlandiyalı Kallum Ovenslə münasibətinə aydınlıq gətirəcək.

Qeyd edək ki, yarışın üçüncü günündə Azərbaycan millisinin 6 boksçusu rinqə çıxacaq.

Xatırladaq ki, çempionatın ilk günü boksçularımızdan Əzrək Bəbirovla (57 kq) Cəlal Qurbanov (63,5 kq) ilk döyüşünü qələbə ilə bitirərərk, müvafiq olaraq 1\4 v\ 1\8 finala yüksəlib. 

İNTİQAM Məmmədov