CÜDO

---------------

Hidayət Heydərov İJF-nın reytinqində birinci, Zəlim Kotsayevsə ikincidir

Noyabrın ilk ongünlüyündə Monpelyedə (Fransa) kişi və qadın cüdoçular arasında keçirilən son Avropa çempionatından və Avstraliyada təşkil edilən Açıq Okeaniya Turnirindən sonra İJF (Beynəlxalq Cüdo Federasiyası) cüdoçuların yeni reytinq cədvəlini elan edib. Azərbaycan cüdoçuları arasında ən yaxşı göstərici sözügedən qitə çempionatında qalib adını qazanan Hidayət Heydərovla (73 kq) Zəlim Kotsayevə (100 kq) məxsusdur. Fransada 3-cü dəfə Avropa çempinu olan Heydərov hazırda 4098 xalla öz çəkisinin lideridir. Onun ən yaxın təqibçisi olan yaponiyalı Hoşimoto Souçhinin isə 3990 xalı var. 4010 xalla ikinci pillədə qərarlaşan Zəlim Kotsayev bu çəkiyə liderlik edən gürcüstanlı İliya Sulemanidzedən (4860) 850 xal geridə olduğu halda üçüncü yerdə yer alan özbəkistanlı Müzəffərbek Turoboyevdən (3789) isə 779 xal öndədir. 

Dgər cüdoçularımıza gəlincə, Səid Mollai  (81 kq) 3038 xalla 4-cü. Yaşar Nəcəfov (66 kq) 2832 xalla 6-cı, 60 kq-da güləşən Balabəy Ağayev 2688 xalla 7-ci. +100 kq çəkidə güləşən Uşanqi Kokuari 2349 xalla Top-10-u tamamlayır. Okeaniya turnirində qalib olan Murad Fətiyevsə (90 kq) 2570 xalla 5 puillə irəliləyərək 10-cu yerə qalxıb. 

Qadınlara gəlincə, 2 təmsilçimiz Top-14-də yer alıb. Onlardan Gültac Məmmədəliyeva (52 kq) 2084) 12-ci, Lüyla Əliyeva (48 kq) isə 2170 xalla 14-cü yerdədir. 

Yeri gəlmişkən, qaydalara görə, həm kişilərin, həm də qadınların reytinq cədvəlində ilk 17 yeri tutan cüdoçular gələn il Parisdə (Fransa) keçiriləcək Olimpiada-2024-ə lisenziya qazanmış olacaq. 

Onu da qeyd edək ki, lisenziyaların sahibləri  2024-cü ilin 23 iyun günü elan ediləcək reytinq cədvəlindən sonra bəlli olacaq. 

İNTİQAM Məmmədov