Rəcəbov 11-ci, Məmmədyarovsa 15-cidir

Beynəlxalq Şahmat Federasiyası (FİDE) dünya şahmatçılarının yeni reytinq cədvəlini elan edib. Qeyd edək ki, əvvəlki cədvəllərdən fərqli olaraq, fevral ayının 1-ə olan cədvəldə Azərbaycan şahmatçılarından yalnız 3 nəfər Top-100-də yer alıb. Bunlardan Teymur Rəcəbov 2747 xalla 11-ci. aktivində 2740 xalı olan Şəhriyar Məmmədyarov bir pillə geriləməklə 15-ci, Qədir Hüseynovsa (2661) 84-cü pillədə qərarlaşıb. 

Kişilərin reytinq cədvəlinə əvvəlki kimi norveçli dunya çempionu Maqnus Karlsen (2852) vahid liderlik edir. Rusiyalı Yan Nepomniyaşinin (2793) ikinci yeri tutduğu cədvəldə ilkl üçlüyü Çin təmsilçisi Dinq Lijen (2788) tamamlayır. 

Qadınlara gəlincə, Top-100-də 5 şahmatçımız yer alıb. Onların arasında ən yaxşı göstərici yenə də Günay Məmmədzadəyə məxsusdur. Aktivində 2472 xalı olan Günay Top-100-ün 20-ci pilləsində yer alıb. İlk yüzlükdə yer alan digər həmyerlilərimizə gəlincə, Ülviyyə Fətəliyeva (2427) 39-cu, Gövhər Beydullayeva (2387) 58-ci, Xanım Balacayeva (2379) 67-ci, Gülnar Məmmədovasa (2376) 69-cu pillədə yer alıb. Qadınların reytinq cədvəlində isə ilk üçlüyü müvafiq adıcıllıqla Xou İfanm (Çin, 2638), Aleksandra Qoryaçkina (Rusiya, 2576) və Xampi Koneru (Hindistan, 2572) tutur. 

Komandaların reytinq cədvəlinə gəlincə, Azərbaycan 2652 xalla 6-cıdır. ABŞ (2728), Rusiya (2702), Hindistan (2690), Çin (2687) və Ukraynadan (2659) geri qalan yığmamız Fransa, Ermənistan, İspaniya, Hollandiya. Almaniya, Polşa, Macarıstan və İzrail kimi bir çox komandanı geridə qoyub.  

İNTİQAM Məmmədov