Masallıda “Heydər Əliyev İli” çərçivəsində tədbir keçirilib

“Heydər Əliyev İli” ilə əlaqədar Yeni Azərbaycan Partiyası (YAP) Masallı rayon təşkilatı tərəfindən tədbir keçirilib.

Əvvəlcə Ulu Öndər Heydər Əliyevin abidəsi önünə gül dəstələri qoyulub, dahi şəxsiyyətin xatirəsi ehtiramla yad olunub.

“Qəhrəmanlar Parkı”ndakı “Şəhidlər” abidə-kompleksi ziyarət edilib, Azərbaycanın ərazi bütövlüyü uğrunda canından keçən qəhrəman Vətən övladlarının əziz xatirələri ehtiramla anılıb.

Masallı şəhər Heydər Əliyev Mərkəzinin foyesində “Ulu Öndər Heydər Əliyev və Azərbaycan mədəniyyəti 100” adlı sərgi ilə tanışlıq olub.

Mərkəzin geniş akt zalında davam edən tədbir öncəsi Dövlət Himnimiz səsləndirilib, Ulu Öndərin və şəhidlərimizin əziz xatirəsi bir dəqiqəlik sükutla yad edilib.

Sonra Ümummili Liderimizin həyat və fəaliyyətindən bəhs edən videoçarx nümayiş olunub.

Tədbiri giriş sözü ilə açan YAP Masallı rayon təşkilatının sədri Seyfəddin Əliyev bildirib ki, Ulu Öndər Heydər Əliyev hər zaman Azərbaycanın tərəqqisi uğrunda çalışmış, xalqını üzləşdiyi çətinliklərdən xilas etmiş dahi şəxsiyyətdir: “Məhz Ümummilli Liderin gərgin əməyi və qətiyyətli siyasəti sayəsində yeni, müasir Azərbaycan dövləti qurulub, ölkəmiz dünya məkanında öz layiqli yerini tutub. Prezident İlham Əliyevin ölkəmizə rəhbərlik etdiyi 20 illik dövr Azərbaycan tarixinin ən qüdrətli, müstəqilliyimizin ən güclü, dövlətçiliyimizin ən möhtəşəm quruculuq mərhələsidir...”

Masallı Rayon İcra Hakimiyyətinin başçısı Araz Əhmədov, Milli Məclisin deputatları Anar İsgəndərov, Məşhur Məmmədov, Musa Qasımlı Heydər Əliyevin zəngin dövlətçilik irsindən, müstəqil Azərbaycan dövlətinin inkişafı naminə müstəsna xidmətlərindən danışıblar:” Yeni Azərbaycan Partiyasının qurucusu və memarı, Ümummilli Lider Heydər Əliyevin davamçısı Prezident İlham Əliyevin  rəhbərliyi ilə həyata keçirilən siyasət nəticəsində Azərbaycan gündən-günə inkişaf edir, yeni nailiyyətlərə imza atır...”

Tədbirin sonunda rayonun ictimai-siyasi həyatında fəal iştirak edən partiya üzvlərinə Fəxri Fərman və Təşəkkürnamələr, YAP sıralarına yeni qoşulanlara üzvlük vəsiqələri təqdim edilib.

Akif AĞAYEV