Fevralın 1-dən 5-dək Xorvatiyada 2023-cü ilin ilk reytinq xarakterli turniri olan “Zaqreb Open” keçiriləcək. Azərbaycan Güləş Federasiyasından (AGF) verilən məlumata görə, turnirdə azərbaycanlı güləşçilər də iştirak edəcəklər. 
Baş məşqçi Namiq Abdullayev, böyük məşqçi Zəlimxan Hüseynov və məşqçi Arif Abdullayevin rəhbərliyi altında sərbəst güləş üzrə yığmamız “Qran-pri”ə 10 güləşçi ilə qatılacaq. Bu onluqda Əliabbas Rzazadə, İslam Bazarqanov (hər ikisi 57 kq), Əli Rəhimzadə (65 kq), Hacı Əliyev, Xadjimurad Qadjiyev (hər ikisi 70 kq), Cəbrayıl Qadjiyev (74 kq), Abubakr Abakarov (86 kq), Osman Nurmaqomedov (92 kq), Maqomedxan Maqomedov (97 kq) və Georgi Meşvildişvili (125 kq) yer alıb.

Qadın güləşçilərin yarışında baş məşqçi əvəzi Rövşən Umudovun rəhbərliyi altında Mariya Stadnik, Türkan Nəsirova (hər ikisi 50 kq), Elnurə Məmmədova (55 kq), Alyona Kolesnik (59 kq) və Elis Manolova (62 kq) özünü sınayacq.

Yunan-Roma güləşi üzrə millimizə gəlincə, bu komandamız turnirə daha geniş tərkibdə qatılacaq. AGF-dan verilən məlumata görə, baş məşqçi Aleksandr Tarakanov, böyük məşqçi Rövşən Bayramov və məşqçi Həsən Əliyevin rəhbərliyi altında yarışa qatılacaq yığmanın heyətinə Eldəniz Əzizli (55 kq), Murad Məmmədov, Nihat Məmmədli (hər ikisi 60 kq), Taleh Məmmədov (63 kq), Həsrət Cəfərov (67 kq), Ülvü Qənizadə (72 kq), Sənan Süleymanov (77 kq), Tuncay Vəzirzadə (82 kq), İslam Abbasov, Məhəmməd Əhmədiyev (hər ikisi 87 kq), Arif Niftullayev, Zamir Maqomedov, Murat Lokyayev (hamısı 97 kq), Sabah Şəriəti, Beka Kandelaki və Sərxan Məmmədov (hamısı 130 kq) cəlb edilib. 

Qeyd edək ki, “Zaqreb Open”də I kateqoriyalı hakim Tural Əliyev ədaləti qoruyacaq.

İNTİQAM Məmmədov