Araz Məmmədov: 

“Unutmaz bu vətən sizi” adlı tədbir keçirildi 

2020-ci il sentyabrın 27-dən Ermənistan Respublikasının ölkəmizə qarşı növbəti hərbi təcavüzünə cavab olaraq Azərbaycan Respublikası Silahlı Qüvvələri Ali Baş Komandanı İlham Əliyevin rəhbərliyi altında  torpaqlarımızın azad edilməsi uğrunda əks hücüm əməliyyatına keçdi.
44 gün sürən qızğın döyüşlərdə müzəffər ordumuzun 3000- ə yaxın hərbi qulluqçusu şəhid oldu,  100 nəfərdən çoxu itkin düşdü, 1000 nəfərə yaxını isə yaralanaraq sağlamlığını itirdi. Torpaqlarımız qəhrəman şəhidlərimizin, əsgər və zabitlərimizin, qazilərimizin qanı və canı bahasına azad edildi.
Ölkəmizin ərazi bütövlüyü yolunda canlarından keçən və Azərbaycan bayrağını işğaldan azad olunan torpaqlarımızda yenidən dalğalandıran qəhrəman oğullarımıza dərin ehtiram əlaməti olaraq ölkə Prezidenti İlham Əliyev cənabları tarixi qələbəmizdən dərhal sonra Anım Günü ilə bağlı Sərəncam imzaladı. Həmin sərəncama əsasən sentyabrın 27-si tarixi respublikamızın hər bir guşəsində Anım Günü kimi qeyd olunur.   

AZPRESS.AZ xəbər verir ki, Cəfər Cabbarlı adına Azərbaycan Dövlət Teatr Muzeyində 22 sentyabr 2023 - cü il tarixində keçirilən “Unutmaz bu vətən sizi! ” adlı tədbirdə İkinci Qarabağ müharibəsində həyatını itirən şəhidlərimiz qürurla anıldı.
 Tədbiri giriş sözü ilə muzeyin  elmi katibi Aytən Məmmədova açıq elan etdi.  Vətən uğrunda canlarını qurban verən, şəhidlik zirvəsinə ucalan qəhrəmanlarımızın əziz xatirəsi bir dəqiqəlik sükutla yad edildikdən sonra  Azərbaycan Respublikasının  Dövlət Himni səsləndirildi. Daha sonra Aytən Məmmədova erməni qəsbkarlarının tarix boyu torpaqlarımıza qarşı apardığı təcavüzkar siyasətindən və ərazi iddialarından, bu yolda törətdikləri cinayətlərdən və dövlətimizin düzgün siyasəti nəticəsində   müzəffər ordumuzun qələbəsindən geniş məruzə ilə çıxış etdi.
Tədbir çərçivəsində  Vətən müharibəsində şəhid olan əsgərlərimizin ailə üzvləri, həmçinin ərazi bütövlüyümüzün uğrunda gedən  döyüşlərdə iştirak edən qazilər  ağır,  amma qürurverici    44 günlük mübarizəmiz  haqqında  öz xatirələrini danışdılar. Həmçinin  tədbirdə muzey əməkdaşları tərəfindən hazırlanan  27 sentyabr Anım Gününə həsr olunmuş video-çarxlar  nümayiş olundu.