CÜDO 

-------------

Yaşar Nəcəfov Bakıda Böyük Dəbilqənin qalibi olub

Yalnız finalda büdrəyən Leyla Əliyeva isə ikinci yeri tutub

Bu gün Bakıdakı Milli Gimnasitika Arenasında kişi və qadın cüdoçular arasında Olimpiya təsnifatlı Böyük Dəbilqə turnirinə start verilib. Heydər Əliyevin 100 illik yubileyinə həsr olunan Bakı turnirində Azərbaycan da daxil olmaqla 61 ölkəni təmsil edən 450 tatami ustası medallar uğrunda mübarizəyə qatılıb. Turnirin ilk günü 5-i qadın olmaqla 13 idmançı ilə təmsil olunan Azərbaycan yığması biri qızıl. digəri gümüş əyarlı olmaqla günü iki medalla (1-1-0) başa vurub. Qızıl medalı 66 kq-da tatamiyə çıxan Yaşar Nəcəfov,  gümüşü isə 48 kq çəkidə güləşən Leyla Əliyeva qazanıb. Qeyd edək ki, Nəcəfov çimpionluq zirvəsinə gedən yolda Ermaka Amangəldini (Qazaxıstan), Eliso Manzini (İtaliya), Murad Çopanovu (Rusiya), 1\4 finalda ispaniyalı David Qarsiya Torneni, yarımfinalda moldovalı Denis Vierunu, həlledici finalda isə yaponiyalı Takeşi Takaekunu "ippon"la məğlub edib.

Gümüş medalın sahibi Leyla Əliyevaya gəlincə, startda Tamara Malkunu (İzrail), ardından italiyalı Françesku Milanini və fransalı Şirin Buklini məğlub edərək yarımfinala yüksəlib. Bu mərhələdə isə serbiyalı rəqibi Miliko Nikoliçi məğlub edərək finala yüksələn Əliyeva təəssüflər olsun ki, həlledici görüşdə İtaliyadan olan digər rəqibinə - Assunte Skutoya məğlub olaraq ikinci yerlə kifayətlənib. 

Sabah isə çəkisi 73 və 81 kq olan kişilər və eləcə də 63, 70 kq-da olan qadınlar tatamiyə çıxacaqlar. 

İNTİQAM Məmmədov