VOLEYBOL

----------------------

"Azərreyl" kişi voleybol komandası bərpa edilib

Klubu  Qazaxıstan millisinin baş məşqçisi Boris Qrebennikov çalışdıracaq

“Azərreyl” kişi voleybol klubu müəyyən fasilədən sonra yenidən bərpa edilib. Klubun rəsmi saytından verilən məlumata görə "dəmiryolçular" qarşıdakı mövsümdə kişi voleybolçular arasında Azərbaycan Yüksək Liqasında mübarizə aparacaq. Komandanın çempionatda inamlı çıxışı üçün artıq formalaşmasına start verilib. 
Əsasən gənclərdən qurulacaq “Azərreyl”in inkişafı üçün kluba təcrübəli mütəxəssis cəlb olunub. Komandada baş məşqçi postuna Qazaxıstan millisinin çalışdırıcısı Boris Qrebennikov gətirilib. Qeyd edək ki, Qazaxıstan və Fransa vətəndaşlığı olan bu çalışdırıcı ilə klub arasında 1 illik müqavilə imzalanıb. Onun qarşısına əsas hədəf kimi “Azərreyl” yüksəklərə daşımaq və Azərbaycan milli komandasına yeni oyunçular hazırlamaq vəzifəsi qoyulub. Boris Qrebennikov, eyni zamanda Qazaxıstan yığmasında da baş məşqçi kimi işini davam etdirəcək.
65 yaşlı mütəxəssis indiyədək müxtəlif ölkələrdə işləyib. Onun uğurlarına gəlincə, Fransanın kişilərdən ibarət “Renn” klubunda oynayan məşqçi fəaliyyətə başlayan Boris daha sonra bu klubda baş məşqçi kimi çalışıb. O, "Renn"ə ölkə kubokunu qazandırıb. Mütəxəssis bunun ardınca Rusiyada “Qazprom-Yuqra” və “Ural” kimi böyük komandaların “sükanı arxasında” olub. Tunisdə “Etual du Sahel”də də işləyən çalışdırıcı burada ölkə çempionatını və Superkubokunu qazanıb. 

Qeri gəlmişkən, “Azərreyl”in qadınlardan ibarət komandası Cengiz Akarçeşmeyə həvalə olunub.

İNTİQAM Nəmmədov