Şahmat

------------------------

Nicat Abbasov FİDE reytinqində 38 pillə irəliləyib

Beynəlxalq Şahmat Federasiyası (FİDE) dünya şahmatçılarının 1 sentyabr tarixə olan yeni reytinq cədvəlini elan edib. Qeyd edək ki, iyulun axırından avqustun ortalarına qədər paytaxt Bakıda keçirlən və iddiaçılar turnirinə seçmə xarakteri daşıyan Dünya Kubokunun nəticələri də nəzərə alınmaqla tərtib edilən yeni cədvəldə ən çox diqqəçəkən məqamlardan biri azərbaycanlı qrossmeyster Nicat Abbasovun 38 pillə irəliləyərək Top-100-də 59-cu yeri tutmasıdır. Nicatın belə irəliləməsinə onun Bakıda təşkil edilən Dünya Kubokunun yarımfinalına çıxması və sonda 4-cü yeri tutmasıdır. O, aktivindəki xalların sayını 2677-ə çatdırıb. 

Digər şahmatçılarımıza gəlincə, ötən il analoji turnirin qalibi olan və Azərbaycan şahmatının liderlərindən sayılan Teymur Rəcəbov (2745) yenə də 14-cü pillədədir. Azərbaycan şahmatının digər lideri - Şəhriyar Məmədyarov (2734) isə 16-cı yeri tutur. Qeyd edək ki, bu üçlükdən başqa  heç bir şahmatçımız Top-100-də yer ala bilməyib. Əvvəlki cədvəldə Top-100-də yer alan Qədir Hüseynov yeni cədvəldə ilk yüzlüyü tərk edib. 

Kişilərin reytinq cədvəlinə yenə də sabiq dünya çempionu, Bakıda keçirilən Dünya Kubokunun qalibi olan norveçli Maqnus Karlsen (2839) şəriksiz liderlik edir. Cədvəldə ikinci yeri Dünya Kubokunun finalında Karlsenə məığlub olan ABŞ təmsilçisi Fabiano Karuna (2788) tutur. İlk üçlüyü isə ABŞ-ın digər təmsilçisi - Xikaru Nakamura (2780) tamamlayır. 

Qadınlara gəlincə, burada yenə də təmsilçilərimiz arasında ən yaxşı göstərici Günay Məmmədzadəyə məxsusdur. O, 2441 xalla Top-100-də 29-cudur. Ülviyyə Fətəliyeva (2387) cədvəldə 63-cü, aktivində 2383 xalı olan Gövhər Beydullayeva isə 68-cidir. Xanım Balacayeva isə yeni cədvəldə Top-100-dəki yerini itirib. 

Qadınların reytinq cədvəlinə yenə də çinli Xou İfan (2628) başçılıq edir. İkinci yeri onun həmyerlisi Yu Vençjin (2560) tutduğu cədvəldə ilk üçlüyü isə Bakıda Dünya Kubokuna sahib çıxan rusiyalı Aleksandra Qoryaçkina (2558) tamamlayır. 

Azərbaycan komandası isə 2649 xalla Top-10-da 6-cı yeri tutur. İlk üçlükdə isə müvafiq ardıcıllıqla ABŞ (2728), Hindistan (2701) və Rusiya (2688) yer alıb. Cədvəldə Çin (2685) və Ukrayna (2650) da Azərbaycandan irəlidədir. 

İNTİQAM Məmmədov