Masallıda tələbələrlə görüş keçirilib

Masallı rayonunda  yüksək balla ali təhsil müəssisələrinə qəbul olmuş tələbələrlə görüş keçirilib.

“Masallı Təhsil Fondu”nun, Masalı Rayon İcra Hakimiyyətini təşkilatçılığı ilə keçirlən tədbirdə rayon İcra hakimiyyətinin başçısı Araz Əhmədov, Milli Məclisin üzvləri Məşhur Məmmədov, Anar İskəndərov, Lənkəran-Astara Regional Təhsil İdarəsinin müdiri Elxan Nəcəfov, YAP-nın Masallı rayon təşkilatının sədri Seyfəddin Əliyev, Masallı rayonu üzrə təhsil sektorunun və “Masallı Təhsil Fondu”nun əməkdaşları, valideynlər və tələbələr iştirak ediblər. 

Ölkəmizdə təhsilin inkişafı, onun maddi-texniki bazasının möhkəmləndirilməsi istiqamətində görülən işlərdən, həyata keçirilən layihələrdən söz açan Masallı RİH başçısı Araz Əhmədov, millət vəkilləri Məşhur Məmmədov, Anar İsgəndərov, Lənkəran-Astara Regional Təhsil İdarəsinin müdiri Elxan Nəcəfov və başqaları bildiriblər ki, Ulu Öndər Heydər Əliyev ölkəyə rəhbərlik etdiyi bütün dövrlərdə təhsilə və onun inkişafına böyük diqqət yetirmişdir. Azərbaycan Prezidenti cənab İlham Əliyev də bu ənənələrə sadiq qalaraq təhsilin inkişafını həmişə diqqətdə saxlayır, bu istiqamətdə mühüm tədbirlər həyata keçirir.

Natiqlər tələbə adını qazanan gəncləri, onlara uğurlar arzulayıblar.

"Masallı Təhsil Fondu"nun icraçı direktoru Hüseyn Hüseynov tədbir iştirakçılarına Fondun fəaliyyəti haqqında ətraflı məlumat verib və hazırki dövrədək ali məktəblərin pedaqoji profilli ixtisaslarına qəbul olmuş 87 tələbənin təhsil haqqının Fond tərəfindən ödənildiyini, 73 tələbəyə isə aylıq təqaüdlərin verildiyini bildirib. Eyni zamanda ali məktəblərdə təhsil alan şəhid övladlarına Fond tərəfindən aylıq 200 manat təqaüd verildiyi qeyd olunub... 

Ali məktəblərə qəbul imtahanlarında 600-dən artıq bal toplamış abituriyentlərə və ali məktəblərdə təhsil alan və ötən tədris ilini uğurla başa vuran tələbələrə fəxri fərman və hədiyyələr təqdim edilib.

Müasir təhsilin nailiyyətlərinə görə ölkə başçısı cənab İlham Əliyevə və Birinci vitse-prezident Mehriban xanım Əliyevaya minnətdarlıq bildirən tələbələr dövlətimizin yüksək diqqət və qayğısına mükəmməl təhsillə, yüksək vətəndaşlıq mövqeyilə cavab verəcəklərini diqqətə çatdırıblar.

Akif AĞAYEV