“Şəhidlər ölməz, Vətən bölünməz!” layihəsinə yeni şeir təqdim olundu

Bakı Şəhər Mədəniyyət Baş İdarəsi Yasamal rayon MKS-nin M.Ş.Vazeh adına Mərkəzi Kitabxanasında həyata keçirilən “Şəhidlər ölməz, Vətən bölünməz!” layihəsinə yeni şeir təqdim olundu.
Kitabxananın Fəxri oxucusu, şair-publisist, AYB-nin üzvü, Prezident təqaüdçüsü Ramiz Qusarçaylının  “Məhərrəm nağılı” şeiri şəhid Məhərrəm İbrahimovun əziz xatirəsinə ithaf olunub. Şəhid jurnalist uzun müddət cəbhəboyu zonada ezamiyyətlərdə olmuş,  Aprel döyüşləri, Tovuz döyüşləri, Vətən müharibəsi zamanı ən qaynar nöqtələrdən xəbərlər, reportajlar hazırlamışdır. Azərbaycanın işğaldan azad olunmuş ərazilərində çəkiliş aparan mediya nümayəndələri Kəlbəcər rayonunun Susuzluq kəndi ərazisində tank əleyhinə minaya düşmüşdürlər. Müəllif şeiri həmin hadisə zamanı şəhid olan Məhərrəm İbrahimovun simasında bütün mediya şəhidlərinin xatirəsinə həsr edib.

Məhərrəm nağılı

Məhərrəm İbrahimovun   simasında 
ölkəmizin bütün mediya şəhidlərinin xatirəsinə

Məhərrəm adında bir oğul vardı,
Ürəyi qüssədən cadar-cadardı,
Göyçənin ətrini gah Kəlbəcərdə 
Gah da ki, Şuşada gəzib tapardı...

Gəzərdi Vətənin hər qarışını,
Dağ-dağ, qaya-qaya yaşayardı o.
Çəkərdi, yazardı, lentə alardı,
Vətəni gözündə daşıyardı o.

Hər anı risk idi, hər anı ölüm,
Çəkdiyi hər süjet bir dastanıydı.
Üzünü isladan şəhid göz yaşı,-
Əlini isladan şəhid qanıydı.

Külli Qarabağa açıb qolunu,
Üz sürtdü Vətənin hər daşına o.
İgid oğulların döyüş yolunu
Köçürdü tarixin yaddaşına o.

Ozü də bir ovuc Qarabağ oldu,
Qarışdı, torpağa, suya Məhərrəm.
Düşdü mələklərin kamerasına
Ruh olub çəkildi göyə Məhərrəm.

Göylər də, yerlər də yerli-yerində,
Ruhlar da, sirrlər də yerli-yerində,
Barmağı silahın tətiyi üstə,
Duası Tanrının qanadı altda,
Üç rəngli bayrağı ürəyi üstə,
Əzmi, iradəsi inadı altda,
Qondu bayrağımın hər rənginə o.
Qarışdı himnimin ahənginə o!

Məhərrəm adında bir oğul vardı,
Ürəyi qüssədən cadar-cadardı,
Göyçənin ətrini gah Qarabağda 
Gah da Zəngəzurda gəzib tapardı,
 Fəqət... Məhərrəmi göylər apardı...