Rəşad Məcid: 

Naxçıvanda Diaspor Gənclərinin IV Yay Düşərgəsi başlayıb

Naxçıvanda Ümummilli lider Heydər Əliyevin 100 illik yubileyi şərəfinə Diaspor Gənclərinin IV Yay düşərgəsinin təşkili çox mühüm bir hadisədir. Bu münasibətlə Naxçıvana dünyanın 50 ölkəsindən 117 diaspor gəncinin gəlməsi, onların burada 1 həftə müxtəlif müzakirələrdə iştirak edərək, Ümummilli liderin doğulub- böyüdüyü qədim diyarın görməli yerləri, tarixi abidələri, fərqli aurası, ab-havası ilə tanış olmaları böyük bir məna kəsb edir.

Düşərgənin İlk paneli də Heydər Əliyevin keçdiyi qeyri-adi ömür yolu haqqında Azərbaycanın dövlət xadimlərinin, tanınmış ziyalıların çıxışları ilə yadda qaldı. Görkəmli dövlət adamı Həsən Həsənovun mühüm faktlarla , səmimi və sistemli şəkildə Heydər Əliyevin Sovet dövründəki fəaliyyətinə nəzər salması tədbirdə iştirak edən gəncləri dərindən düşündürmək baxımından onlar üçün böyük bir ustad dərsi oldu. Eyni zamanda görkəmli alimlərimiz professor Vilayət Quliyev və akademik Rafael Hüseynov Ümummilli liderin fəaliyyətinin müxtəlif istiqamətləri barədə çıxışlar etdilər. Gənclərin onları çox diqqətlə dinləmələri həm mövzuya, həm də bu dəyərli insanların xatirələrinə ciddi maraqdan xəbər verirdi.

Növbəti paneldə media rəhbərlərinin gənclərlə debatı, indi Azərbaycan diasporunun qarşısında duran məsələlər, medianın öhdəsinə düşən vəzifələr barədə müzakirələr də qaynar və maraqlı keçdi. Sosial medianın geniş vüsət aldığı indiki şəraitdə diaspor gənclərinin informasiya müharibəsini necə görmələri, yaşadıqları ölkələrdə Azərbaycanın təbliği, öz sahələrində peşəkarlığı artırmalarının vacibliyi barədə fikir mübadilələri ilə, faydalı polemikalarla yadda qaldı.

İnanıram ki, yeni panellər və maraqlı ekskursiyalarla bir həftə davam edəcək Düşərgə unudulmaz, təkrarsız səhifəyə çevriləcək, diaspor gənclərinin gələcək həyat yollarında və düşüncə aləmində öz parlaq izlərini qoyacaq.

Bizim birgünlük Naxçıvan səfərimiz zəngin təəssüratlarla dolu oldu. Diasporla iş üzrə Dövlət Komitəsinin sədri Fuad Muradovun diasporumuzun real vəziyyəti , gənclərin Yay Düşərgələrinin əhəmiyyəti və nəticələri, həmçinin digər məsələlər barədə fikirləri, sadaladığı faktlar bizdə nikbinliklə bədbinliyin vəhdətindən ibarət bir ovqat yaratdı, ancaq ümumən ümid aşıladı və xoş duyğularla yaddaşımıza həkk olundu.

Həsən Həsənovun debatda və debatdan kənarda söylədiyi xatirələr isə heç yaddan çıxası deyil. Bu birgünlük, amma dopdolu səfərin, o debatın, bütövlükdə belə bir Yay Düşərgəsinin təşkilinə görə minnətdarlığımız, zənnimcə, təşkilatçıların halal haqqıdır.