Osman Gündüz: 

Radioyayım üçün ayrılan 13.7 milyon manat vəsait necə xərclənəcək, hansı texnologiyalara üstünlük veriləcək?

Ötən gün Prezident İlham Əliyevin Sərəncamı ilə Azərbaycan ərazisində radioyayım şəbəkəsinin genişləndirilməsi üçün 13.7 milyon vəsait ayrılıb.

Xatırlayıram ki, ötən il RİNN bununla bağlı hökumətə təkliflər vermişdi . Audiovizual Şuranın da bu istiqamətdə təşəbbüsləri vardı.

Dərhal qeyd edim ki, RİNN tərəfindən ölkənin informasiya fəzasının qorunması istiqamətində səyləri, təkliflərin dəstəklənməsinə nail olması və ona müvafiq resurslar əldə etməsi təqdirəlayiqdir.

Bildiyim qədər ayrılan vəsait çərçivəsində qeyd olunan təkliflərə uyğun olaraq bütün Azərbaycan ərazisində 120 yeni FM radioyayım stansiyasının quraşdırılması, milli radio proqramların əhatə dairəsinin və keyfiyyətinin artırılması nəzərdə tutulub.

Gözləmək olar ki yalnız Bakıda əlçatan olan radiolar artıq bütün ölkə üzrə yayımlanacaq.

Güman ki , layihəni hələlik yayım infrastrukturu sahəsində inhisarçı qurum olan Teleradio İstehsalart Birliyi icra edəcək, Dövlət Radiotezliklər İdarəsi yeni tezlik resursları ayıracaq.

Düşünürəm ki, bu layihə, indiki şəraitdə vətəndaşlarımıza bütün ölkə ərazisində daha çox və keyfiyyətli radio yayımı qəbul etmə imkanının yaradılması baxımından əhəmiyyətli bir addımdır.

Xüsusən də, sərhəd regionlarında yaşayanlar üçün yerli radio kanallarına da əlçatanlıq təmin ediləcək.

Eyni zamanda bununla da yerli radio yayım şirkətlərinin rəqabətliliyi və dayanıqlılığı da güclənəcək.

Bununla belə, fikrimcə burada incə bir məqam da var.

Ayrılan dövlət resursu ölkədə FM şəbəkəsinin genişləndirilməsini nəzərdə tutub.

100 yaşı olan bu texnologiya isə getdikcə köhnəlir və qocalır.

Müşahidələr göstərir ki , dünyada FM radio üzərindən informasiya ötürülməsi getdikcə səngiyir. İnsanlar da getdikcə bu texnologiyadan uzaqlaşırlar, multimediaya, sosial mediaya, interaktivliyə, internet kanallara meyl edirlər.

Odur ki, yalnız avtomobillərdə olan FM-in də yerini DAB (Digital Audio Broadcasting ) texnologiyası, rəqəmsal radio yayım tutur.

Xatırlayıram ki, Azərbaycanda da rəqəmsal radio yayımın test edilməsi işləri aparılırdı.

Burada ciddi problem son istifadəçi üçün bu tip texnologiya ilə işləyəbək qəbuledici avadanlığın əldə edilməsidir.

Bildiyim qədər RİNN rəqəmsal radioyayıma, DAB texnologiyasına keçidlə bağlı Tədbirlər Planını da hökumətə təqdim edib.

Düşünürəm ki, 5-6 ildən sonra DAB -a tələbat xeyli yüksələcək.

Bu texnoligiya ilə bir tezlik resursunda bir neçə radio kanalın daha keyfiyyətli yayımı mümkün olduğundan tezliklərdən daha effektiv istifadəyə də imkan verəcək.

Odur ki, qarşıdakı illərdə investisiyaların məhz bu istiqamətdə yatırımı doğru olardı.