Masallı RİH başçısı Miyənkü ərazisinin 3 ucqar kəndində olub

Dico və Ulum yaşayış məskənlərində...

Masallı Rayon İcra Hakimiyyətinin başçısı Araz Əhmədov rayonun Miyənkü kənd inzibati ərazi vahidinə daxil olan Dico və Ulum yaşayış massivlərində olub. 

Rayon rəhbərinin həmin məskənlərə fəaliyyəti dövründə üçüncü səfəridir. Həmin səfər Araz Əhmədovun tapşırığına əsasən dağ relyefli ərazisində quraşdırılan əvvəllər adi cığır, sonradan avtomobillərin gediş-gəlişinə şəraitin yaradılması ilə əlamətdar olub. 

Belə ki, Viləşçay Su Anbarı İstismarı İdarəsi tərəfindən istifadəyə verilən yol meşəliklərin içərisindən keçir və uzunluğu 11 kilometrdir.

Rayon rəhbəri əvvəllər diqqətdən kənarda qalan Dico və Ulum məskənlərinə gedən yolda görülmüş işlərlə yerində tanış olmuş, tapşırıq və tövsiyələrini verib. 

Sonda rayon rəhbəri yaşayış massivlərinin hər birində ailələrlə çay süfrəsi arxasında həmsöhbət olub, onların məişət və sosial problemləri ilə bir daha maraqlanıb.

Sakinlər onlara göstərilən diqqət və qayğıya görə Dövlətimizin başçısı İlham Əliyevə, rayon rəhbərinə minnətdarlıqlarını bildiriblər.

Kubin kəndində artezian quyusu istifadəyə verilib

Miyankü ərazisinin Kubin kəndində Birinci Qarabağ şəhidi Eldar Xamıyev adına orta məktəbin həyətində sakinlərin təşəbbüsü və Masallı Rayon İcra Hakimiyyəti başçısının tapşırığı ilə Viləşçay Su Anbarı İstismarı İdarəsi tərəfindən ümumi dərinliyi 30 metrə yaxın olan artezian quyusu qazılıb istifadəyə verilib.

Ərazidə olarkən RİH başçısı Araz Əhmədov sakinləri dinləyib, onları narahat edən bəzi məsələlərin həlli istiqamətində müvafiq tapşırıq və tövsiyələrini verib.

Ulu Öndər Heydər Əliyevin 100 illik yubileyində, müqəddəs Məhərrəm günlərində əhaliyə belə bir hədiyyə edilməsinin onlar üçün böyük sevinc olduğunu qeyd edən kənd sakinləri Kubin məktəbinin həyətində artezian quyusunun qazılmasına, şəhidlərə ehtiram, ailələrinə göstərilən diqqət və qayğıya görə Respublika Prezidenti cənab İlham Əliyevə, Birinci vitse-prezident Mehriban xanım Əliyevaya, rayon rəhbərinə minnətdarlıqlarını ifadə ediblər.

Akif AĞAYEV