VOLEYBOL

----------------------------

Avro-2023-ə Bosniya və Hersoqovinada hazırlaşan qadın voleybol yığmamız bu gün vətənə dönəcək 

Avro-2023-ə hazırlaşan qadın voleybol yığmamız türkiyəli mütəxəssis Ataman Güneyligilin rəhbərliyi altında Bosniya və Herseqovinanın Zenitsa şəhərində təlim-məşq toplanışını (TMT) davam etdirir. Bu ərəfədə qadın voleybolçulardan ibarət millimiz həmin ölkənin yığma komandası ilə üç yoldaşlıq oyunu da keçirib. Azərbaycan Voleybol Federasiyasından verilən məlumata görə, ilk oyunda 2:2 hesabı qeydə alınıb. Digər iki qarşılaşmada isə millimiz 3:1 hesablı qələbə qazanıb. Bu oyunlarda komandamızın yeni sistem və taktikaları sınaqdan keçirilib.

Xatırladaq ki, komandamız AVRO-2021-də Bosniya və Herseqovina yığmasına 0:3 hesabı ilə məğlub olmuşdu.

Qeyd edək ki, yığmamız dünən keçirilən son matçla Bosniya və Herseqovinadakı təlim-məşq toplanışını başa vurub. Komanda bu gün Bakıya dönəcək və AÇ-ya hazırlıq prosesini paytxda davam etdirəcək. Yeri gəlmişkən, yığmamız tarixində 10-cu dəfə bu yarışa qatılacaq.

Xatırladaq ki, Avro-2023 avqustun 15-dən sentyabrın 2-dək Belçika, Almaniya, İtaliya və Estoniyada keçiriləcək. Yığmamız Çexiya (18 avqust), Almaniya (19 avqust), Türkiyə (20 avqust), Yunanıstan (22 avqust) və İsveçlə (23 avqust) birlikdə C qrupunda yer alıb. Azərbaycan bütün qrup oyunlarını Düsseldorfda (Almaniya) keçirəcək. 

İNTİQAM Məmmədov