“Şuşa fatehlərinin zəfər yolu” adlı layihəyə start verildi

“Şuşa fatehlərinin zəfər yolu” adlı layihəyə start verilmişdir. Layihə çərçivəsində “Dəmir Yumruq” zəfər baletinin müharibə iştirakçılarımız və onların ailələri qarşısında təntənəli premyerası planlaşdırılır. Bu layihə onların həm Şuşa zəfəri xatirələrini yad etmələri, həm də qazandıqları şanlı zəfərin bu gün əsərlərdə, böyük səhnələrdə necə əks olunduğuna, yaşadıldığına şahid olmaları baxımından əhəmiyyətlidir.
Layihə “Mədəni Əlaqələrin İnkişafına Dəstək”, “20 yanvar Şəhid Ailələrinin Hüquqlarının Təmin Olunması”, “Skandinaviya Ölkələri ilə Mədəni və Elmi Əlaqələr” ictimai birliklərinin koalisiyası adından QHT-larına Dövlət Dəstəyi Agentliyi tərəfindən “Müharibə iştirakçılarının sosial vəziyyətinin yaxşılaşdırılmasına dair təşəbbüslər” istiqaməti üzrə keçirlmiş müsabiqədə qalib olmuşdur.
 “DƏMİR YUMRUQ” zəfər baletinin librettosu (ədəbi mətni) baş roldakı qəhrəman əsgərimizin (XTQ baş leytenant, Vətən Müharibəsi Qəhrəmanı Adil İbrahimli) timsalında I Qarabağ müharibəsindən başlayaraq, Şuşa zəfərinə doğru gedən keşməkeşli yolu tərənnüm edir. I Qarabağ müharibəsi zamanı hələ balaca olan oğlan uşağının gözü qarşısında mənfur düşmənlər tərəfindən  atasının amansızca öldürülməsi nəticəsində aldığı travma onun kiçik qəlbində böyük iz qoyur. Daxili aləmində toplanmış qisas istəyi və vətən həsrəti ilə böyüyərək gənclik illərinə çatan əsas obraz artıq zamanın dolduğunu, ali baş komandanın irəli göstərişi ilə Vətən müharibəsinin başladığını eşidir. Xalqının və ailəsinin intiqamını almaq üçün Vətən müharibəsini  şans kimi dəyərləndirdən qəhrəman gəncimiz, sevdiyi xanımla vidalaşaraq igid dostları ilə müharibəyə yollanır. Qəhrəman Azərbaycan ordusu yenilməzlik nümayiş etdirərək ard-arda zəfərlər qazanır və qəhrəmanımız bayrağımızı Şuşa zirvəsində dalğalandıraraq dəmir yumruğunu göyə qaldırır.  Qeyd edək ki, “Dəmir yumruq” zəfər baleti bu mövzuda ilk iri həcmli əsərdir.
Balet tamaşasında hadisələr simvolik olaraq məhz 44 dəqiqə çərçivəsində cərəyan edir. Bir pərdəli balet Əməkdar artist Yuri Lobaçevin librettosu əsasında yazılıb. Baletin bəstəkarı, Azərbaycan Bəstəkarlar İttifaqının Gənclərlə iş bölməsinin rəhbəri, Bakı Musiqi Akademiyasının doktorantı və elmi tədqiqat mərkəzinin əməkdaşı İlahə Qismət, baletmeysterləri isə Əməkdar artistlər Yuri Lobaçev və Ceyhun Qubadovdur. 
Premyera 19 iyul 2023-cu il saat 19:00-da Opera Studiyasının (Şəmsi Bədəlbəyli 98) konsert salonunda baş tutacaq.