Mais İbrahimov:

Ağcabədidə “Narkomaniyaya yox deyək” mövzusunda tədbir keçirilib

İyunun 5-də Ağcabədi Bayraq Muzeyində “Narkomaniyaya yox deyək” mövzusunda tədbir keşirilib. 
AZpress.AZ-ın bölgə müxbiri xəbər verir ki, tədbirdə Ağcabədi Rayon İcra Hakimiyyəti başçısının birinci müavini Xətai Zeynalov, Ağcabədi Rayon İcra Hakimiyyətinin İctimai-siyasi və humanitar məsələlər şöbəsinin baş məsləhətçisi Sevinc Niftalıyeva, Ağcabədi rayon Polis şöbəsi rəisinin Əməliyyat İşləri üzrə birinci müavini,  polis polkovnik-leytenantı Elmir Dəmirçiyev, şöbənin bir qrup polis əməkdaşları, Ağcabədi rayon Mərkəzi Xəstəxanası Publik Şəxsin işçiləri, Ağcabədi rayon Təhsil Sektorunun nümayəndələri, Ağcabədi rayon Gənclər və İdman idarəsinin kollektivi və ümumtəhsil məktəblərində Uşaq birliklərinin rəhbərləri və məktəblərin psixoloqları iştirak ediblər. 
Çıxış edən Ağcabədi Rayon İcra Hakimiyyəti başçısının birinci müavini Xətai Zeynalov cəmiyyətimizin hazırkı ən böyük bəlalarından biri olan, “ag ölüm” adlandırılan narkomaniyanın törətdiyi ağır fəsadlar haqqında tədbir iştirakçılarına ətraflı məlumat verərək bu zərərli vərdişin hazırda təkcə gənclər arasında deyil, orta və digər yaş kateqoriyalarına mənsub olan insanların arasında daha geniş yayıldığını diqqətə çatdırıb. O, bu halın qarşısının alınması üçün insanlar arasında, xüsusən orta məktəblərdə və digər tədris ocaqlarında tez-tez maarifləndirici tədbirlərin keçirilməsinin vacibliyini diqqətə çatdırıb. 
Ağcabədi rayon Polis şöbəsi rəisinin Əməliyyat İşləri üzrə birinci müavini Elmir Dəmirçiyev də öz çıxında vurğulayıb ki, narkomaniya ilə mübarizədə hər kəs, bir bir vətəndaş polis orqanları ilə həmrəy olaraq zərərli vərdişlərə qarşı birgə mübarizə aparmalıdır. Polis polkovnik-leytenantı həmçinin təəssüf hissi ilə qeyd edib ki, ötən il rayonumuzda narkotik istifadəçilərinin sayı orta hesabla 40-a bərabər idisə, bu ilin statistikasına görə bu rəqəmin göstəricisi artıq 80-ə bərabərdir. O da vurğulanıb ki, narkotik maddələrdən istifadə edənlərin say çoxluğu rayon mərkəzində və rayonun Hindarx qəsəbəsində daha çox üstünlük təşkil edir. Bununla yanaşı Elmir Dəmiçiyev polis əməkdaşlarının bu sahədə keçirdikləri əməliyyat-istintaq tədbirlərindən, saxlanılan şəxslərin istintaqa cəlb edilməsilə yanaşı, onlar arasında maarifləndirici söhbətlərin daim aparıldığını da diqqətə çatdırıb.