“Vətən fədailəri” kitabı ictimaiyyətə təqdim olunub

Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran Regional filialının təşkilatçılığı ilə şəhid anası Şövqiyyə Ülvinin (Azayeva) 44 günlük Vətən müharibəsində şəhid olmuş övladı Ülvi Azayevin və Kürdəmir şəhidlərinin xatirəsinə həsr etdiyi "Vətən fədailəri" adlı kitabının təqdimat mərasimi keçirilib.
Öncə Ərəbqubalı kənd məzarlığında dəfn olunan şəhidlərin məzarları ziyarət edilib, məzarları üzərinə tər çiçəklər qoyulub, əziz xatirələri ehtiramla yad edilib.

Kürdəmir rayon İlyas Məmmədov adına Ərəbqubalı kənd tam orta məktəbində təşkil olunan tədbir Dövlət Himninin səsləndirilməsi ilə başlayıb.

Daha sonra ölkəmizin ərazi bütövlüyü uğrunda canlarını fəda etmiş bütün şəhidlərimizin xatirəsi bir dəqiqəlik sükutla yad edilib.

Təqdimat mərasimini “Vətən fədailəri” kitabının redaktoru və “Ön söz”ün müəllifi, muzeyin Aran Regional filialının müdiri, filologiya üzrə fəlsəfə doktoru Yaqut Bahadurqızı açaraq Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi altında 44 gün ərzində əldə olunan möhtəşəm Qələbənin müstəqillik tariximizin şanlı səhifəsi olduğunu vurğulayıb. O, Vətən müharibəsi dövründə və ondan sonrakı quruculuq dövründə yazılan ədəbi əsərlərdən, onların cəmiyyətimiz və gənc nəsil üçün tərbiyəvi əhəmiyyətindən bəhs edib. 

Ərəbqubalı kənd tam orta məktəbinin direktoru Mayis Bayramov şəhidlərin adlarının əbədiləşdirilməsi, onların həyat tarixçəsinin qan yaddaşına köçürülməsi məramı ilə vətənpərvər şəhid anası Şövqiyyə Azayevanın oxuculara təqdim etdiyi “Vətən fədailəri” kitabının gənc nəslin hərbi vətənpərvərlik ruhunda tərbiyə edilməsi baxımından əhəmiyyətini vurğulayıb. 
Tədbirdə Kürdəmir rayon İcra Hakimiyyətinin məsul işçisi Mirmahmud Mahmudov, şəhid ailələri Simuzər Bağıyeva, Cəmafət Əzizova, AYB-nin üzvləri Əlisəfa Azayev, Abduləziz Xanəhmədoğlu, Yadigar Təvəkgül, Ərəbqubalı kənd İcra nümayəndəsi Zülfüqar Şirinov, Cümə məscidinin imamı Aqil Əliyev, hərbçi mayor Qorxmaz Mehdiyev, kənd ağsaqqalı  Sahib Musayev, şairə Tənzilə Əliyeva çıxış edərək kitab haqqında fikirlərini bölüşüblər. Bildirilib ki, gələcək nəsillər bu kitabı vərəqləyərkən Zəfər tariximizi daha yaxından öyrənəcək, özlərində düzgün yanaşma formalaşdıracaqlar. Nəşrdə şəhidlərə həsr olunan şeirlər də mövcuddur. 
Çıxış edənlər, həmçinin müəllifin təqdim etdiyi kitabın yeniyetmələrə, gənclərə vətənpərvərlik ruhu, anaya, Vətənə, torpağa sevgi, dosta sədaqət kimi müqəddəs hisslər aşıladığını bildiriblər.
Sonra məktəblilər “Vətən fədailəri” kitabından hazırladıqları kompazisiyanı təqdim ediblər.
Təqdimat mərasiminin sonunda kitabın müəllifi Şövqiyyə Azayeva əməyinə göstərilən diqqətə görə tədbirin təşkilatçılarına və iştirakçılara təşəkkür edib. O, “Vətən fədailəri” kitabını şəhid ailələrinə və rayon ictimaiyyətinin nümayəndələrinə hədiyyə edib.