Həbib Misirov: 

YAP Kəlbəcər təşkilatının sədri şəhid ailəsini Qurban bayramı münasibətilə təbrik edib

Yeni Azərbaycan Partiyası (YAP) Kəlbəcər Rayon Təşkilatının sədri Həbib Misirov və YAP Kəlbəcər rayon təşkilatının məsləhətçisi Səkinə Baxışzadə Qurban Bayramı münasibətilə Tərtər rayonun Bəyimsarov kəndində məskunlaşan Vətən müharibəsi şəhidi Həsənli Zəlimxan Rafiq oğlunun ailəsini ziyarət edərək Qurban Bayramını təbrik edib, bayram sovqatları çatdırıb.

YAP Kəlbəcər rayon təşkilatının sədri Həbib Misirov dövlətimizin şəhid ailələrinə göstərdiyi diqqət və qayğıdan danışıb, hər zaman dövlətin şəhid ailələrinin yanında olduğunu bildirib.

Şəhidlərimizin ailə üzvüləri dövlət səviyyəsində şəhid ailələrinə göstərilən diqqət və qayğıdan razı qaldıqlarını bildirmiş, Prezident İlham Əliyevə və Birinci vitse-prezident Mehriban xanım Əliyevaya minnətdarlıqlarını ifadə ediblər.

Əslən Kəlbəcər rayonundan olan Həsənli Zəlimxan Rafiq oğlu 2001-ci ildə Tərtər rayonunun Bəyimsarov kəndində anadan olub. 2020-ci ilin yanvar ayında hərbi xidmətə gedib, sentyabrın 27-də Azərbaycan Ordusunun həyata keçirdiyi əks-hücum əməliyyatlarında artilleriya komandasında iştirak edib.

Tərtərin igid oğlu Fizuli və Xocavənd istiqamətində gedən döyüşlərdə iştirak edib və 11 oktyabr 2020-ci ildə Füzuli-Hadrut istiqamətində döyüş tapşırığının yerinə yetirilməsi zamanı qəhrəmancasına şəhid olub. Subay idi. 12 oktyabr 2020-ci ildə Tərtər rayon Bəyimsarov kəndində dəfn edilib.

Ölümündən sonra 19 yaşlı Zəlimxan Azərbaycan Respublikası Prezidentinin müvafiq Sərəncamları ilə “Vətən uğrunda”, “Füzulinin azad olunmasına görə”, “Xocavəndin azad olunmasına görə”, “Cəbrayılın azad olunmasına görə” və “İgidliyə görə” medalları ilə təltif olunub.

Uca Allah dövlətimizi qorusun! Şəhidlərimizin ruhu şad olsun! Allah Şəhidlərimizin doğmalarına səbr versin!