BASKETBOL. 3X3. AK

----------------------------------------

Basketbol yığmalarımız Avropa Kubokunda mübarizəni davam etdirir

Dünən Kiprin Limasol şəhərində həm kişilər, həm də qadınlar arasında startı verilən 3X3 basketbolu üzrə Avropa Kubokunun seçmə mərhələsi davam edir. Qeyd edək ki, heyəti Amil Həmzəyev, Zaur Paşayev, Cəbrayıl Əkbərov, və Endar Poladxanlıdan ibarət olan kişi komandamız A qrupunda Malta, Lüksemburq və Kipr millisi ilə, heyətində Tatyana Deniskina, Dina Ulyanova, Mersedes Uolker və Aleksandra Mellenxauerin cəmləşdiyi qadın yığmamız isə Malta və İrlandiya millisi ilə bir qrupda (A) mübarizə aparıb. Qadın komandamız qrupda keçirdiyi hər iki oyunu udaraq, qrup lideri kimi  birbaşa yarımfinal mərhələsinə, kişilərimiz isə 3 oyundan ikisində məğlubiyyətlə üzləşdiyi üçün mübarizəni pley-offdan davam etdirmək imkanı qazanıb. Aleksandr Valxoviçin rəhbərlik etdiyi kişi komandamız startda Maltanı 20:14 hesabla udandan sonra Kiprə 11:22, Lüksemburqa isə 14:16 hesabla uduzub. 

Ratomira Deliçin başçılıq etdiyi qadın yığmamız isə qrupda həm Mltanı (17:15), həm də İrlandiyanı (15:10) məğlub edib. Bu gün qadın yığmamız 1\2 finalda yenidən Malta ilə qarşılaşacaq. Kişi millimiz isə 1\4 finalda İrlandiya ilə üzləşəcək. 

Qeyd edək ki, həm kişilərin, həm də qadınların yarışında finalı da udaraq, birinci yeri tutan komanda Avropa Kubokunun 5-7 sentyabr günlərində Yerusəlimdə (İzrail) keçiriləcək final mərhələsində vəsiqə qazanmış olacaq. 

İNTİQAM Məmmədov