VELOYÜRÜŞ

---------------------------------------

"Əziz Şuşa" beynəlxalq veloyürüş başa çatıb

İtaliyalı velosipedçi Ansaloni Emanuele son mərhələnin və yürüşün ümumi qalibi olub

Mayın 7-dən 11-dək Azərbaycanda Ulu Öndər Heydər Əliyevin 100 ilik yubeleyinə həsr olunan 2,2 beynəlxalq veloyürüş keçirilib. Beş mərhələdən ibarət olan yürüşdə 14 ölkəni təmsil edən 16 komandanın heyətində 100-dən çox velosipedçi mübarizə aparıb. Xatırladaq ki, mayın 7-də Bakı-İsmayıllı (185.5 km) marşurutu üzrə start götürən yürüşə bu gün Beyləqan-Şuşa marşurutu üzrə davam edən 5-ci mərhələ ilə yekun vurulub. Son mərhələdə velosipedçilər 134,9 km məsafəni qət ediblər. Son mərhələdə İtalyanın "Team Technipes İnemiliaromagna" komandasının velosipedçisi Ansaloni Emanuele hamıdan tez finişə çatıb. Maraqlıdır ki, son mərhələnin qalibi olan Emanuele, həm də "Əziz Şuşa" Beynəlxalq Velosiped yürüşünün qalibi oldu. Azərbaycan komandasından isə ən yaxşı nəticəni finişə 11-ci gələn Musa Mikayılzadə göstərib. Yekunda isə o, 12-ci yeri tutub. Komanda yarışının qalibi İtalyanın "Team Technipes İnemiliaromagna" komandası olub. Yürüşə ev sahibliyi edən Azərbaycan isə 16 komanda arasında 9-cu yerlə kifəyətlənib.

Xatırladaq ki, iştirakçılar 2-ci mərhələ çərçivəsində Qəbələ-Şəki-Qəbələ marşurutu üzrə 176,2 km, 3-cü mərhələdə Qəbələ-Gəncə marşurutu üzrə 170 km, 4-cü mərhələdə isə Gəncə-Göygöl marşurutu üzrə 102.9 km məsafəni qət ediblər.

Yürüşün ən yaxşı velosipedçisi 2024-cü ildə Parisdə (Fransa) keçiriləcək Olimpiada-2024-ə lisenziya xalları qazanacaq. 

İNTİQAM Məmmədov