OLİMPİZM

-------------------------

Azərbaycan 3-cü Avropa Oyunlarının atletika yarışlarına 15 atletlə qatılacaq

İyunun 20-dən iyulun 2-dək Polşanın Krakov şəhərində sayca 3-cü olan Avropa Oyunları keçiriləcək. Artıq Oyunların proqramına daxil olan idman növləri və eləcə də həmin növlər üzrə yarışların keçiriləcəyi vaxt dəqiqiləşib. Qeyd edək ki, Avropa Oyunlarında Köhnə Qitənin 48 ölkəsini təmsil edən 2000 atlet idmanın 37 növündə mübarizə aparacaq. İştirakçı ölkələr, o cümlədən Azərbaycan da Oyunlarda hansı idman növlərində və neçə idmançı ilə təmsil olunacağını müəyyənləşdirib. Bu gün isə Azərbaycan Atletika (Yüngül) Federasiyası Oyunlarda iştirak edəcək komandanın heyətini elan edib. 15 nəfərlik komandanın heyətinə atletlərdən Nazim Babayev, Fəxriyyə Tağızadə (hər ikisi uzununa tullanmaq), Aleksis Kopelo, Yekaterina Sarıyeva (hər ikisi 3 təkanla tullanma), Anna Skidin (çəkic atmaq), İsmayıl Əliyev (yadro itələmək), Əlxam Nağıyev (100, 200, 4X100, 4X400 m məsafəyə qaçış), Lamiyə Vəliyeva, İlahə Quliyeva (hər ikisi 100, 200 və 400 m məsafəyə qaçış), Cavid Məmmədov (400, 4X400 VƏ 400 m baryerləri aşmaqla qaçış), Elman Abuşov (5000, 1500 və 800 m məsafəyə qaçış), Aleksey Əliəkbərov, Əli Abdiyev və Qədir Qurbanov (4X400 m estafet qaçış) cəlb edilib.

Oyunlarda atletika (yüngül) yarışları 20-25 iyun aralığında keçiriləcək və atletlər 37 dəst medal uğrunda mübarizə aparacaqlar. 

İNTİQAM Məmmədov