TAEKVONDO

---------------------

Dünya çempionatının nümayəndə heyəti Fəxri xiyabanda və Şəhidlər xiyabanında olublar

Bakıda keçirilən taekvondo üzrə dünya çempionatın davam edir. Azərbaycan Taekvondo Federasiyasından verilən məlumata görə, ev sahibliyi etdiyimiz mundialın nümayəndə heyəti, Dünya Taekvondo Federasiyasının prezidenti Çunqvon Çu, həmin qurumun baş katibi Seo Jeonqkanq, Türkiyə Taekvondo Federasiyasının prezidenti Metin Şahin və Azərbaycan Taekvondo Federasiyasının rəsmiləri Fəxri xiyabana gələrək xalqımızın ümummilli lideri Heydər Əliyevin xatirəsini yad edib, məzarı önünə əklil və gül dəstələri qoyublar.

Görkəmli oftalmoloq-alim, akademik Zərifə xanım Əliyevanın da xatirəsi anılıb, məzarı üzərinə tər çiçəklər düzülüb.

Ardından nümayəndə heyəti Şəhidlər xiyabanına gedərək Azərbaycanın müstəqilliyi və ərazi bütövlüyü uğrunda canlarından keçmiş qəhrəman Vətən övladlarının məzarlarını ziyarət edib, “Əbədi məşəl” abidəsinin önünə əklil qoyub.

Qeyd edək ki, mayın 29-da Bakıda start götürən dünya çempionatına iyunun 4-də yekun vurulacaq. Dünya Taekvondosunun 50, Ümummilli Liderin 100 illiyinə təsadüf edən mundialda Azərbaycan da daxil olmaqla 145 ölkədən 949 idmançı medallar uğrunda mübarizəyə qatılıb.

İNTİQAM Məmmədov