BDU-da “Biologiyanın aktual problemləri davamlı inkişaf kontekstində” mövzusunda Respublika elmi konfransı 

BDU-da “Biologiyanın aktual problemləri davamlı inkişaf kontekstində” mövzusunda Respublika elmi konfransı 
Bakı Dövlət Universitetinin (BDU) Biologiya fakültəsində Ümummilli Lider Heydər Əliyevin 100 illik yubileyinə həsr olunmuş “Biologiyanın aktual problemləri davamlı inkişaf kontekstində” mövzusunda Respublika elmi konfransı keçirilib. 
Biologiya fakültəsinin dekanı Afət Məmmədova bildirib ki, konfrans ölkənin davamlı inkişafını təmin etmək üçün prioritet elmi tədqiqatlara müasir innovativ texnologiyaların  tətbiqinin effektivliyinin təhlili və qiymətləndirməsinə, biologiyanın inkişafında intellektual kapitalın əhəmiyyətinin artırılmasına xidmət edir. Konfrans elmi və texnoloji inkişafın müasir mərhələsində biologiyanın aktual problemlərinin həllinə müxtəlif mütəxəssis və alimləri cəlb etmək, bu sahədə tədqiqat işlərinin elmi-praktik nəticələrini ümumiləşdirmək, habelə onları populyarlaşdırmaq məqsədi daşıyır. 
BDU-nun Elmi fəaliyyətin təşkili və innovasiyalar Mərkəzinin direktoru, professor Mais Süleymanov, Molekulyar Biologiya və Biotexnologiyalar İnstitutunun Bioinformatika laboratoriyasının müdiri, AMEA-nın müxbir üzvü, professor İlham Şahmuradov, Zoologiya İnstitutunun direktoru, dosent Ələddin  Eyvazov, Botanika İnstitutunun icraçı  direktoru, professor Şakir Qasımov, Azərbaycan Tibb Universitetinin Biokimya kafedrasının müdiri, professor Gülnarə Əzizova, ATU-nun Farmakologiya kafedrasının müdiri Məhbubə Vəliyeva , Azərbaycan Dövlət Pedaqoji Universitetinin Biologiya və onun tədrisi kafedrasının müdiri, dosent Anaxanım Yusifova çıxış edərək biologiya elminin prioritet istiqamətləri, aktual problemləri barədə danışıb, bu sahədəki bilik və bacarıqların optimallaşdırılması, habelə elmi əlaqələrin genişləndirilməsinin zəruriliyini vurğulayıblar. 
Daha sonra Ümummilli Lider Heydər Əliyevin həyatı və çoxşaxəli fəaliyyəti ilə bağlı videoçarx nümayiş olunub. 
Plenar sessiyada Biofizika və biokimya kafedrasının müdiri, professor Rövşən Xəlilov və Molekulyar biologiya və biotexnologiyalar kafedrasının professoru Saib Güləhmədov məruzələrlə çıxış ediblər. 
Konfransa müxtəlif ali məktəb və elmi-tədqiqat institutlarından 185 material təqdim olunub. Baglanış mərasimində BDU rektorunun elm və təhsil üzrə müşaviri, professor Aydın Kazımzadə, Beynəlxalq ələqələr üzrə prorektor, dosent Şahin Pənahov və Elmi fəaliyyətin təşkili və innovasiyalar Mərkəzinin direktoru, professor Mais Süleymanov  konfransın işini qənaətbəxş qiymətləndirib, iştirakçılara sertifikatlar təqdim ediblər. 

Bakı Dövlət Universiteti (BDU), ICESCO, İzmir Yüksək Texnologiya İnstitutu (Türkiyə) və Lahore Universitetinin (Pakistan) birgə təşkilatçılığı ilə, akademik Mirəli Axundovun anadan olmasının 120 illiyinə həsr olunmuş “Biologiyada nailiyyətlər və çağırışlar” adlı 11-ci Beynəlxalq elmi konfransın açılış mərasimi keçirilib.
Əvvəlcə Dövlət himni səsləndirlib, torpaqlarımızın azadlığı uğrunda həlak olan şəhidlərimizin əziz xatirəsi bir dəqiqəlik sükutla yad edilib.
Daha sonra Azərbaycan və BDU haqqında videoçarxlar nümayiş etdirilib.
Konfransın açılış mərasimində çıxış edən BDU-nun rektoru Elçin Babayev Universitetin Biologiya fakültəsinin ilk məzunlarından biri olan əməkdar elm xadimi, professor Mirəli Axundovun 120 illiyinə həsr olunmuş “Biologiyada nailiyyətlər və çağırışlar” mövzusunda 11-ci Beynəlxalq elmi konfransın iştirakçılarını salamlayıb. Qeyd edib ki, konfransın “Biologiyada nailiyyətlər və çağırışlar” kimi adlandırılması təsadüfi deyil. Ölkəmizdə dünya elminin tələblərinə cavab verən tədqiqatların aparılması, elmi-texniki potensialın inkişafı, eləcə də yüksəkixtisaslı kadrların hazırlanması dövlət siyasətinin prioritet istiqamətlərindəndir. Həyat elmləri və biologiya BDU-nun təbiət elmləri sahəsində 5 əsas elmi prioritetindən biridir. Təsadüfi deyil ki, BDU-da Tədqiqat, İnkişaf və İnnovasiyalar üzrə Mükəmməllik Mərkəzinin nəzdində Biomühəndislik, Mikrobiologiya və virusologiya elmi-tədqiqat laboratoriyaları fəaliyyət göstərir. Aqrar sahədə müasir molekulyar bioloji metodların tədqiqi və tətbiqi ilə yeni genotiplərin yaradılması və ümumilikdə ölkəmizdə qida təhlükəsizliyinə töhfə vermək məqsədilə Tədqiqat, İnkişaf və İnnovasiyalar üzrə Mükəmməllik Mərkəzində Hüceyrə kulturası və genom redaktəsi elmi-tədqiqat laboratoriyası yaradılıb və hazırda strukturu formalaşdırılır. Bu, yeni biotexnoloji metodların inkişafına və biotexnologiya sahəsində ixtisaslı mütəxəssislərin hazırlanmasına təkan olacaq.
Rektor vurğulayıb ki, təhsil-elm-tədqiqat-innovasiya mərkəzlərindən birinə çevrilməkdə olan BDU-da elmin bütün sahələri üzrə kadr hazırlığı həyata keçirilir. Əməkdaşlığın inkişaf etdirilməsi, beynəlxalq elm və təhsil təşkilatları, dünyanın nüfuzlu universitetləri və elmi qurumları ilə əlaqələrin genişləndirilməsi BDU-nun inkişaf strategiyasının prioritet istiqamətlərindəndir. BDU 2022-ci ildə İslam Dünyası Universitetləri Federasiyasına (FUIW) üzv qəbul olunub və ICESCO tərəfindən ali təhsil müəssisələri üçün Açıq Təhsilin İnkişafı layihəsi çərçivəsində tədqiqatçı-alimlər üçün təşkil olunacaq treninqlərdə, həmçinin dünyanın ən nüfuzlu ali təhsil ocaqları və elmi-tədqiqat müəssisələri ilə aparılacaq təcrübə mübadiləsində fəal şəkildə iştirak edəcək. Azərbaycanda yalnız BDU-da ICESCO-nun Biotibbi materiallar kafedrası yaradılıb və kafedra artıq fəaliyyət göstərir: “Biotibbi materialar kafedrasının yaradılmasının təkcə Azərbaycanda deyil, islam dünyası ölkələrində biotibb elminin inkişafına əlavə təkan verəcəyinə əminik. Kafedra biotibbi materiallar üzrə tədqiqat işlərinin aparılmasına, ICESCO-ya üzv dövlətlərdən olan tələbə və gənc alimlərin bu araşdırmalara cəlb edilməsinə və əməkdaşlığın qurulmasına da yardım göstərəcək”.
İzmir Yüksək Texnologiya İnstitutunun rektoru Yusuf Baran çıxışında həm Azərbaycanın, həm də Asiyanın ən yaxşı universitetlərindən olan BDU-da keçirilən konfransın böyük əhəmiyyətə malik olduğunu vurğulayıb və iştirakçılara uğurlar arzulayıb. Yer üzündə yaşamın biologiya elmi ilə bağlı olduğunu bildirən Yusuf Baran qeyd edib ki, mühüm elmi problemlərin və çağırışların müzakirə ediləcəyi konfrans iştirakçı universitetlər arasında güclü əməkdaşlıqların da başlanğıcı olacaq.
Daha sonra açılış mərasimində çıxış edən Azərbaycan Tibb Universitetinin rektoru Gəray Gəraybəyli, Milli Məclisin deputatı, BDU-nun Genetika kafedrasının müdiri Kamilə Əliyeva, Molekulyar Biologiya və Biotexnologiyalar İnstitutunun direktoru İradə Hüseynova, Bolqarıstanın Mikrobiologiya İnstitutunun əməkdaşı Lyudmila Kabaivanova, Qazaxıstanın L.N.Qumilyov adına Avrasiya Milli Universitetinin Hüceyrə Biologiyası və Biotexnologiyaları İnstitutunun direktoru Rahmetkaji Bersimbay, V. Axundov adına Milli Elmi-Tədqiqat Tibbi Profilaktika İnstitutunun direktoru Adil Allahverdiyev, Biofizika İnstitutunun direktoru Oqtay Qasımov, BDU-nun Biologiya fakültəsinin dekanı Afət Məmmədova, Mirəli Axundovun övladı, Genetika və təkamül təlimi kafedrasının professoru Ellada Axundova çıxışlarında akademik Mirəli Axundovun biologiya elminin inkişafında xidmətlərindən, eləcə də biologiya elminin prioritet istiqamətləri, aktual problemləri barədə danışıb, bu sahədəki bilik və bacarıqların optimallaşdırılması, habelə elmi əlaqələrin genişləndirilməsinin zəruriliyini vurğulayıblar.
19 xarici ölkədən (Türkiyə, Fransa, İspaniya, Koreya, Serbiya, Bolqarıstan, Pakistan, Mərakeş, Hindistan, Belarus, Polşa, İran, Nigeriya, Özbəkistan, Rusiya, Argentina, Braziliya, Qazaxıstan, Gürcüstan), ölkəmizin bir çox ali təhsil müəssisələri və elmi-tədqiqat institutlarından olan tədqiqatçıların iştirakı ilə keçirilən beynəlxalq elmi konfransda genetika, molekulyar biologiya, mikrobiologiya, biofizika, biokimya, fiziologiya, nanobiotexnologiya, botanika, flora müxtəlifliyinin mühafizəsi, zoologiya və akvakulturalar, canlı sistemlərin ekologiyası kimi sahələr üzrə məruzələr dinlənilir. Konfransın bölmə iclaslarında  müxtəlif ölkələrdən olan dəvətli məruzəçilərin bu sahələrin problemləri və alınmış ən son nəticələr üzrə çıxışları olacaq.
Konfrans öz işini sabah da davam etdirəcək.