Fəridə Aslanova Rüstəmova:

O qədər parazit insanlar var ki...

Günüm yollarda keçir. Dörd divar arasında xanım-xatın olmağa nə var ki! Kişi qızısan, cəmiyyətdə, kütlənin içində baş çıxar.

O qədər parazit insanlar var ki...

İki gündür ardıcıl olaraq yollarda dini təbliğatçıların hədəfinə tuş gəlirəm, onlar məni və digərlərini ələ almağa çalışırdılar.

Dünən sürücü də daxil, taksidə bir-birimizi tanımayan 5 nəfər idik. Sərnişinlərdən biri olan "DİNDAR" düz bir saatlıq yolu uca səslə yazdığı kitabından danışıb. Hamını "din-iman"a gətirmək istəyirdi guya...

O danışır, danışır, mənsə, öz aləmimdəyəm, çünki nəyin necə olduğunu ondan daha yaxşı bilirəm.

Niyə Allah xofu yaradaraq insanları ibadətə cəlb etməyə çalışırlar? Bilmirəm məqsədləri nədir? Heç təbliğatlarını da düzgün üsülla aparmırlar. Hər gözəlliyin bünövrəsində sevgi dayanmalıdır. Qorxu yox!

Nə isə...

Özünüzü yollarda kitab paylayan, o din pərdəsi arxasında gizlənənlərdən qoruyun...

Taksidən düşdüm, elə yoluma davam etmək istəyirdim ki, birdən iki qız qarşımı kəsdi. Yağışdan çıxıb yağmura düşdüm. Onlar nəzakətlə yaxınlaşsalar da, verdikləri suallar qıcıq doğurdu. Soruşurdular ki, Allaha inanıram, ya yox?

Maşınların səs-küyündən əvvəlcə onların nə demək istədiklərini anlamadım. Sonra qızlardan biri nömrəmi istədi və dedi ki, telefonla Allahın kəlamlarını göndəcək.

Dedim cavan qızlarsınız, gedin işinizlə məşğul olun. Mənim Allahım, mənim vicdanımdır. O gözəgörünməzə inandım, inanmadım, sizə nə!

Allaha sevgi hər kəsin öz daxili işidir. Diqtə ilə sevgi olmaz, sevginin enerjisini duymaq lazımdır...

Bu arada ölkəmizin təhlükəsizlik orqanlarını daha da diqqətli olmağa çağırıram, bir araşdırıb görsünlər ki, yollarda özlərinə həşir gələnlərin əsas məqsədləri nədir, onları maliyyələşdirənlər kimlərdir? Nəyə görə onlar "ilan" kimi qıvrıla-qıvrıla, sürünə-sürünə küçələrdədilər? Qarınlarının azarı nədir?

Diqqətli olaq!