Masallıda mülki müdafiə təlimləri keçirilib

 
Masallı Rayon İcra Hakimiyyəti və Fövqəladə Hallar Nazirliyinin Cənub Regional Mərkəzinin birgə təşkilatçılığı ilə “İrimiqyaslı fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə edilməsinin təşkili” mövzusunda kompleks mülki müdafiə təlimləri keçirilib.
Masallı Rayon İcra Hakimiyyətinin başçısı Araz Əhmədov, Fövqəladə Hallar Komissiyasının üzvləri, FHN-nin Cənub Regional Mərkəzinin rəhbərliyi ərazidə qurulmuş, fövqəladə hallar zamanı istifadə olunan idarəetmə məntəqəsi və müvafiq avadanlıqlarla təchiz edilmiş çadırlara baxış keçiriblər.
Masallı rayonunun mülki müdafiə rəhbərliyi, fövqəladə hallar komissiyası, icra hakimiyyətinin mülki müdafiə qərargahı, rayonun mülki müdafiə xidmətləri, yüksək hazırlıqlı ərazi və obyekt mülki müdafiə dəstələri, idarə, müəssisə və təşkilatlar, eləcə də FHN-nin Cənub Regional Mərkəzinin, Mülki müdafiə qoşunlarının “N” saylı hərbi hissəsinin, Masallı rayon Polis şöbəsinin, Dövlət Yanğından Mühafizə Xidmətinin Masallı rayon Dövlət Yanğından Mühafizə hissəsinin şəxsi heyəti və texnikası cəlb olunub.
Təlimdə əsas diqqət komandir-rəis heyətinin idarəetmə bacarıqlarının və mülki müdafiə dəstələrinin şəxsi heyətinin peşəkarlıq səviyyəsinin artırılmasına, FHN qüvvələri ilə hərbiləşdirilməmiş mülki müdafiə dəstələri arasında qarşılıqlı fəaliyyətin əlaqələndirilməsinə, əməliyyat qərargahının işinin təşkilinə, xilasetmə və digər təxirəsalınmaz işlərin aparılması zamanı təhlükəsizlik qaydalarına ciddi riayət olunmasına yönəldilib.
FHN-nin qüvvələri, rayonun mülki müdafiə dəstələri və xidmətlərinin qarşılıqlı fəaliyyəti təşkil edilib, şərti olaraq qabaqlayıcı əməliyyat tədbirlərini yerinə yetirilib.
 
Akif AĞAYEV