Heydər Əliyevin 100 illiyinə həsr olunmuş təntənəli konsert keçirilib

Zəngin tarixə malik Azərbaycan torpağı daim elm xadimləri, siyasətçilər, dövlət başçıları yetirmişdir. 

Belə dahi şəxsiyyətlərdən biri Müstəqil Azərbaycan dövlətinin memarı və qurucusu Ulu Öndər Heydər Əliyevdir. 

Bu il xalqımız Ümummilli lider Heydər Əliyevin 100 illik yubileyini ölkəmizin məsuliyyətli və şərəfli tarixinin böyük hadisəsi kimi qeyd edir. Bu tarixi yubiley müstəqil Azərbaycanda milli dövlətçiliyin yüksək təntənəsidir. 

Azərbaycan Respublikasının Prezidenti İlham Əliyevin “Azərbaycan Respublikasında 2023-cü ilin “Heydər Əliyev İli” elan edilməsi haqqında” 29 sentyabr 2022-ci il tarixli sərəncamı xalqımızın taleyində xüsusi yeri və rolu olan qüdrətli rəhbərə ümumxalq ehtiramını dövlət səviyyəsində ifadə edən mühüm siyasi tarixi sənəddir. Dövlət başçısının 2022-ci ilin noyabrın 28-də imzaladığı digər sərəncam ilə “Azərbaycan Respublikasında 2023-cü ilin “Heydər Əliyev İli” elan edilməsi ilə bağlı Tədbirlər Planı” təsdiqləndi. 

Tədbirlər planına uyğun olaraq, bütün sahələrlə yanaşı, mədəniyyətə, incəsənət xadimlərinə böyük diqqət ayıran və hər zaman dəstək olan Ulu Öndərin anadan olmasının 100 illiyi ilə əlaqədar ölkəmizdə və xaricdə müxtəlif konsertlər, konfranslar, müsabiqələr keçirilməkdədir.

 Heydər Əliyevin 100 illik yubileyinə həsr olunmuş zəngin çalarlı tədbirlərdən biri də 15 may 2023-cü il tarixində Müslüm Maqomayev adına Azərbaycan Dövlət Filarmoniyasının Kamera və Orqan Musiqi zalında baş tutdu.

Konsert 33 nömrəli Uşaq Musiqi Məktəbinin istedadlı şagirdlərinin təqdimatında keçirildi.

Qeyd edək ki, bu şagirdlər təhsil aldıqları musiqi məktəbinin adını uca tutaraq, müxtəlif müsabiqələrdə uğurla çıxış edib, kiçik yaşlarından Respublika və beynəlxalq müsabiqə laureatları adını qazanmağa müvəffəq olmuşlar.

Belə ki, konsertdə məktəbin peşəkar müəllimləri olan Elnarə Allahverdiyeva, Rüfət Manafov, Emin Bəhramlı, Günay İmamverdiyeva, Ramiz Əliyev, İradə İsmayılova, Səmilə Dadaşova, Böyükxanım Hümbətova, Sevda Ağayeva, Lalə Hüseynova, Fidan Musayeva, Ruhəngiz Budaqova, Elmira Əliyeva, Ağabəy Ağabəyov, Aytən Cəfərova, Bəhruz Bədəlov, Ramil Nurullayev, Mətanət Cəbrayıllı, Bəhram Məmmədli, Nəcəf Vəliyevin şagirdləri - Aleksey Dzyuba, Murad Ağabəyov, Fatimə Süleymanlı, Xədicə Nəcəfli, Maksim İvantsov, Mansur Şıxəliyev, Toğrul Şıxəliyev, Cəmilə Əliyeva, Lalə Bəhramlı, Nərgiz Zülfüqarlı, Nihat Saatlı, Məryəm Ağayeva, Xanım Nədizadə, Nihat Hüseynli və Rəhilə Cəbrayılova parlaq çıxışları ilə dinləyicilərdə xoş ovqat yaratdılar. 

Konsert proqramının xüsusi zövqlə, dəqiqliklə seçildiyini də vurğulamamaq mümkün deyil. 

Rəngarəng konsert proqramında Azərbaycan, rus və xarici ölkə bəstəkarlarının əsərləri səsləndirildi. 

Musiqi xadimlərinin, müxtəlif media işçilərinin və çoxlu sayda musiqisevərlərin iştirak etdiyi bayram ab-havalı konsert gecəsi tamaşaçıların gurultulu alqış sədaları altında başa çatdı. 

Çəkilən böyük zəhmətin, uğurlu idarəetmənin arxasında  dayanan 33 nömrəli Uşaq Musiqi Məktəbinin direktoru Nəzifə xanım Əliyevanın əməyi xüsusilə qeyd olunmalıdır. 

Məhz Nəzifə xanımın əzmkarlığı, tələbkarlığı, işinə olan sonsuz sevgisi məktəbin müəllim heyətinə və şagirdlərinə də yansımışdır.

Bütün bu gərgin fəaliyyətin nəticəsidir ki, məktəbin nailiyyətləri durmadan artmaqda davam edir. 

Konsertdən sonra söz Nəzifə xanıma verildi. 

O, tədbirdə iştirak edən bütün qonaqlara, musiqi ictimai xadimlərinə dərin təşəkkürünü bildirdi. 

Eyni zamanda məktəbinin müəllimlərinin əməyini yüksək qiymətləndirərək, onların şagirdlər üzərində çəkilən əziyyətini xüsusilə vurğuladı.

Sonra çıxış üçün söz Bakı şəhər Mədəniyyət Baş idarəsinin rəisi cənab İbrahim Əliyevə verildi.

O da öz növbəsində gənc musiqiçiləri təbrik edərək, onlara yeni-yeni yaradıcılıq uğurları arzu etdi. 

Üzeyir Hacıbəyli adına Bakı Musiqi Akademiyasının Mətbuat katibi,

musiqişünas Ofelya İsgəndərova