HÜMBƏT QULİYEV: 

"Şlyapa-papaq”

Dubaya işgüzar səfərə gedənlər, adətən Deyra bölgəsində qalırlar.

Biz də yoldaşımla belə edirik. Bu bölgədə yerləşən Əl-Məmzər çimərliyinə getməyi də mütləq öz qrafikimizə salırıq. Artıq çimərliyə çatanda, məlum oldu ki, mənim günlük-papağım oteldə qalıb. Səhra günəşi altında, papaqsız olmaq mümkünsüzdür. Mən elə çimərlikdə yerləşən dükana getdim. Şıdırğı dondurma və sərin su satan satıcıdan günəş papağı soruşdum. O, başını döndərib mağazanın iç küncündə asılmış yeğanə papağı göstərdi. Nə etməli, çox da bahalı olmayan şlyapanı satıcının sevinci ilə birlikdə aldım.

Şlyapa-papaq haqqında ayrıca deməliyəm. Parlaq çəhrayı rəngdə, uniseks, orijinal fasonu vardı. Forması qədim fransız rəssamlarının papaqlarına bənzəyirdi, üstəlik qeyri- adi dimdiyi də vardı. Yoldaşım bu papaq- şlyapanı başımda görəndə gülməkdən özünü saxlaya bilmədi. Mənim arqumentlərim onun gülüş səbəbindən güclü idi. Birincisi, başımı isti günəşdən qorumalı idim, ikincisi, burda məni onsuz da heç kim tanımırdı. Üçüncüsü də, bu papaq Azərbaycana aparılmayacaqdı.

Daha doğrusu,aparılası deyildi. Bu papaq elə oteldə qəsdən yaddan çıxarılıb qalacaqdı.

İndi yazımın maraqlı hissəsi. Yoldaşımla isti körfəz suyunda üzürük. Bir cavan rus cütlüyü üzə-üzə bizə yaxınlaşdı. Xanım məndən utana-utana soruşdu:- bağışlayın, mən dizaynerəm, siz bu gözəl şlyapanı hardan almısınız?

Belə situasiyalarda mənim başım parodoksal işləyir. Dedim:- Parisdən.

Xanım cəld yoldaşına tərəf dönərək; -gördün, mən sənə dedim axı bu ekskluziv, müəllif şlyapasıdır.

Xanım yenə də mənə tərəf döndü: -Bahalıdır, yəqin?

- Hə, çox bahalıdır. Xanım həsəd hissi ilə şlyapama baxıb, məmnunluqla bir daha mənə təşəkkür etdi.

Çimərliyin cıxacağında bu cütlüyü təkrar gördük. Xanım məmnun olsa da , yoldaşı pərişan görünürdü. Mən onlara yaxınlaşıb dedim;- siz gözəl cütlüksünüz, xatirə olaraq mən bu şlyapanı sizə hədiyyə edirəm. Xanım özünü itirdi;- nə danışırsınız, biz belə bahalı hədiyyəni qəbul edə bilmərik. Dedim ki, narahat olmayın mən hər il Parisdə oluram, özümə başqasını alaram.

Siz, kaş o cütlüyün sifətlərində olan heyrət və sevinc hissini görəydiniz!

Hümbət Həsənoğlu