BOKS

-----------

Alfonso Dominqes DÇ-nın finalına yüksəlib

Məhəmməd Abdullayevsə yenə də bürünclə kifayətlənib

Özbəkistanın paytaxtı Daşkənddə kişi boksçular arasında keçirilən dünya çempionatı artıq finişə çatıb. Dünən Azərbaycan yığmasının iki  üzvü - Alfonso Dominqes (86 kq) və Məhəmməd Abdullayev (+92 kq) də iştirak etməklə mundialda yarımfinal döyüşləri keçirilib və bununla da finalçılar bəlli olub. Təəssüflər olsun ki, iki yarımfinalçımızdan biri - Dominqes finala yüksəlsə də, digəri - Abdullayev məğlubiyyətə uğrayaraq, finaldan kənarda qalıb. 

Xatırladaq ki, Dominqes finala çıxışda gürgüstanlı Georgiy Kuşitaşvilini 5:0 (29:28, 29:28, 30:27, 30:27, 30:27) hesabla məğlub edib. Abdullayevsə kubalı boksçu Fernando Lopes Arsola 1:4 hesabla uduzub. Bununla da Məhəmməd Abdullayev 2021-ci ildə Belqradda keçirilən dünya çempionatında olduğu kimi bu dəfə də bürünc medalla kifayətlənib. Elə həmin mundialda dünya çempionu adını qazanan boksçumuz Dominqes isə adını finala yazdıraraq, yenidən çempionluq uğrunda mübarizə aparmaq imkanı qazanıb. Pekin Olimpidasının mükafatçısı olan Dominqes mayın 14-də keçiriləcək həlledici finalda rusiyalı Şarabutdin Atayevlə qarşılaşacaq. 

Xatırladaq ki, baş məşqçisi kubalı mütəxəssis Pedro Roke olan nyığmamızın digər üzvləri - Tural Sarıyev (48 kq), Məsud Yusifzadə (51 kq), Nicat Hüseynov (54 kq), Ümid Rüstəmov (57 kq), Tayfur Əliyev (60 kq), Malik Həsənov (63.5 kq), Nəbi İsgəndərov (67 kq), Sərxan Əliyev (71 kq), Mirşərif Kazımzadə (75 kq), Murad Allahverdiyerv (80 kq) və Eldar Quliyev (92 kq) mundialda erkən mübarizəni dayandırıb. 

İNTİQAM Məmmədov