CÜDO 

-----------

Tatami ustalarımızın mundialdakı fiaskosu davam edir

Məmmədədli Mehtiyevlə Murad Fətiyev də uzaq gedə bilməyib

Qətərin paytaxtı Dohada kişi və qadın cüdoçular arasında keçirilən və Azərbaycan idmançılarının da (9 kişi, 4 qadın) qatıldığı dünya çempionatı artıq ekvator xəttini keçib. Təəssüflər olsun ki, mundialın geridə qalan 5 günündə tatamiyə çıxan Azərbaycan təmsilçilərindən (11 cüdoçu) heç biri mükafatçılar arasında yer ala bilməyib. Qeyd edək ki, çempionatın beşinci günü daha iki cüdoçumuz - hər ikisi 90 kq-da güləşən Məmmədəli Mehtiyev və Murad Fətiyev mübarizəyə qatılıb. Di gəl ki, bu cütlüyümüz də özlərindən əvvəlki komanda yoldaşları kimi uzaq gedə bilməyib. Qeyd edək ki, 1\32 finaldan mübarizəyə qatılan və  start görüşündə kamerunlu Kevin Budainanı, ardından isə Erlan Şerovu (Qırğızıstan) məğlub edərək 1\8 finala yüksələn Mehtiyev bu mərhələdə isveçli Markus Nyumanla bacarmayıb. 

Murad Fətiyev də onun kimi ilk görüşdə Rumıniya təmsilçisi Aleks Kreti və ardından yunanıstanlı Teodoros Tselidisanı üstələsə də, 1\8 finalda üzləşdiyi İvan Silvaya (Kuba) uduzub. 

Sabah isə daha bir cüdoçumuz - Zəlim Kotsayev (100 kq) mübarizəyə qatılacaq. 

İNTİQAM Məmmədov