BƏYBALA MİRZƏYEV:

Partiyalar ələnir...

Dəyərli jurnalist dostumuz Etibar Cəbrayıloğlu bugünlərdə sosial şəbəkədə paylaşımlarından birində həm ciddən, həm də yarızarafat tərzdə soruşmuşdu ki, "Görəsən, bəzi partiyaların hələ də özünü buraxmamaqda məqsədi nədir?".

Yazılan rəylərin əksəriyyəti məzəli səpkidə idi.

Lakin Etibar bəy siyasəti bilən və siyasi prosesləri yaxından izləyən bir şəxs kimi əslində bu bircə cümləlik və yaxud da bir suallıq paylaşımı ilə günümüzün ən ağrılı, aktual məsələlərindən birinə toxunmuşdu.

Budur, qocaman partiya sədrlərimizdən biri sanki sözügedən paylaşıma cavab olaraq Etibar bəyi və bizi çox da gözləməyə qoymadı.

Belə ki, bu gün ölkəmizdə daha bir partiya fəaliyyətinə son verdi. Vahid Azərbaycan Milli Birlik Partiyası (VAMBP) özünü buraxması barədə bəyanat yaydı.

Söhbət 1993-cü ildə dövlət qeydiyyatına alınan istiqlalçı deputat Hacıbaba Əzimovun rəhbərlik etdiyi partiyadan gedir. Beləliklə, Hacıbaba müəllim də partiya sədri olaraq böyük siyasətlə vidalaşdı.

Bundan bir neçə gün öncə isə Qulamhüseyn Əlibəylinin rəhbərlik etdiyi Aydınlar Partiyası da öz fəaliyyətinə xitam vermişdi.

Ümumən isə, qeydiyyatda olan 59 siyasi partiyadan 16-sı artıq fəaliyyətini dayandırıb. Bu ilin mart ayının əvvəllərindən etibarən partiyalar özünü buraxmağa başlayıb.

Həmin partiyaların siyahısına gəlin bir daha göz gəzdirək:

1.Aydınlar Partiyası,

2.Müstəqil Xalq Partiyası (MXP),

3.Azərbaycan Milli Demokrat Partiyası (AMDP),

4.Yeni Yol Partiyası,

5.Azərbaycan Respublikaçılar Partiyası,

6.Müstəqil Azərbaycan Partiyası,

7.Azərbaycan Vahid Kommunist Partiyası,

8.Azərbaycan Sosial Demokrat Partiyası (ASDP),

9.Azərbaycan Liberal Demokrat Partiyası (ALDP),

10.Milli Vəhdət Partiyası (MVP),

11.Azərbaycan Sosial Rifah Partiyası (ASRP),

12.Azərbaycan Naminə Alyans Partiyası (ANAP),

13.Azərbaycan Təkamül Partiyası,

14.Birlik partiyası,

15.Azərbaycan Azad Respublikaçılar Partiyası,

16.Vahid Azərbaycan Milli Birlik Partiyası.

Bu partiyalar, necə deyərlər, "zəhmətkeşlər"in müraciətlərini, paylaşımlarını nəzərə alaraq öz hüquqi fəaliyyətlərinə xitam vermək barədə qərar qəbul ediblər.

Az öncə təqdim etdiyim siyahının genişlənmə ehtimalı da var. Çünki yerdə qalan digər 43 partiyanın da bəziləri xalqımızı çox da intizarda qoymayaraq qarşıdakı günlərdə öz fəaliyyətinə nöqtə qoyacaq.

Bəli, "Siyasi partiyalar haqqında" yenin qanunun tələbləri ilə ayaqlaşmaq hər partiyanın işi deyil. Ona görə də təbii seçmə, ələnmə prosesi gedir, yaz aylarında "yarpaq tökümü" baş verir.

Bu prosesin sonunda böyük ehtimalla yəqin ki, 25-30 partiya qalacaq. Növbəti mərhələdə isə onların da arasında inteqrasiya baş verəcək.

İzləyək.