Masallıda əmək yarmarkası keçirilib

Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin Lənkəran-Astara Regional Məşğulluq filialının və Masallı Rayon İcra Hakimiyyətinin birgə təşkilatçılığı ilə növbəti əmək yarmarkası keçirilib.
Tədbiri giriş sözü ilə açan Masallı Rayon İcra Hakimiyyətinin başçısı Araz Əhmədov bildirib ki, Azərbaycan Respublikasının Prezidenti cənab İlham Əliyevin ölkə vətəndaşlarına göstərdiyi diqqət və qayğı, işsizliyin aradan qaldırılması, insanların rifah halının yaxşılaşıdırılması istiqamətində müxtəlif tədbirlər həyata keçirilir: “Bu gün “2019-2030-cu illər üçün Azərbaycan Respublikasının Məşğulluq Strategiyası”nın təsdiq edilməsi haqqında Azərbaycan Respublikası Prezidentinin Sərəncamına uyğun olaraq növbəti əmək yarmarkası təşkil edilib.
Bugünkü əmək yarmarkası rayonun məşğulluq sahəsində keyfiyyət göstəricilərinin inkişaf etdirilməsinə, layiqli iş yerlərinin yaradılmasına, insanların işlə təmin olunmasına və sosial cəhətdən həssas əhali qruplarının əmək bazarında iştirakının artırılmasına yönəldilən bir tədbirdir.
İnanıram ki, tədbirdə iştirak edən 25 idarə-müəssisə və 65 iri əmək tutumlu sahibkarlıq subyektləri yeni iş yerlərinin yaradılmasına diqqəti artıracaq və işaxtaranların işlə təmin olunmasına yaxından köməklik göstərəcəklər...”
Lənkəran-Astara Regional Məşğulluq Filialının müdiri Rasim Harəzmşah, “Masallı İstisu Sanatoriyası” MMC-nin rəhbəri İldırım Allahyarov və başqaları çıxışlarında insan kapitalının inkişafı hesabına davamlı iqtisadi tərəqqinin təmin edilməsinin müasir dövrdə Azərbaycan dövlətinin sosial-iqtisadi siyasətinin əsasını təşkil etdiyini, ötən illərdə bu sahədə kompleks tədbirlərin həyata keçirildiyini və yüksək nailiyyətlərin əldə olunduğunu vurğulayıblar.
Sonra işaxtaran və işsiz şəxslərin vakansiyalarla tanış olunmasına başlanılıb.
Məlumat üçün bildirək ki, Masallı Olimpiya İdman Kompleksində təşkil olunan əmək yarmarkasında Lənkəran-Astara iqtisadi rayonunda fəaliyyət göstərən 25 idarə, müəssisə, təşkilat və fərdi sahibkar iştirak edib. Yarmarkaya qatılan işsiz və işaxtaran şəxslər işəgötürənlər tərəfindən təqdim edilən 260-dan çox vakansiya ilə tanış olmaq imkanı əldə ediblər. Vakansiyalara müraciət edən şəxslərin anket məlumatları (CV forması) qəbul edilərək nəzərdən keçirilib, uyğun namizədlər növbəti mərhələyə dəvət olunublar.
Yarmarkada işsiz və işaxtaran şəxslərə agentliyin aktiv məşğulluq istiqamətləri barədə məlumat verilib, müraciət etmək istəyən şəxslərlə ilkin sorğular həyata keçirilib.
 
Akif AĞAYEV