BOKS

----------

Mundiala qatılacaq Azərbaycan yığmasının heyəti müəyyənləşib

Mayın 1-də Özbəkistanın paytaxtı Daşkənddə kişilər arasında boks üzrə dünya çempionatına start veriləcək. Azərbaycan Boks Federasiyasından verilən məlumata görə, mundiala qatılacaq Azərbaycan yığmasının heyəti müəyyənləşib. 14 gün davam edəcək dünya çempionatında ölkəmiz 13 dəri əlcək ustası ilə təmsil olunacaq. Qeyd edək ki, komandanın məşqçilər korpusu dünya çempionatına gedəcək heyətə Tural Sarıyev (48 kq), Məsud Yusifzadə (51 kq), Nicat Hüseynov (54 kq), Ümid Rüstəmov (57 kq), Tayfur Əliyev (60 kq), Malik Həsənov (63,5 kq), Nəbi İsgəndərov (67 kq), Sərxan Əliyev (71 kq), Mirşərif Kazımzadə (75 kq), Murad Allahverdiyev (80 kq), Alfonso Dominqes (86 kq), Eldar Quliyev (92 kq) və Məhəmməd Abdullayev (+92 kq) cəlb edib. 

Aprelin 28-də Azərbaycan Boks Federasiyasının İdarə Heyətinin üzvü Rövşən Hüseynovun rəhbərliyi altında Daşkəndə yollanacaq komandamız mayın 15-də Bakıya qayıdacaq.

Mayın 30-da püşkatma mərasimi olacaq və boksçularımızın startdakı rəqibləri bəlli olacaq. 

Onu da qeyd edək ki, əvvəlki mundiallardan fərqli olaraq, bu dəfəki çempionatın mükafat fondu  5 200 000 dollar təşkil edir. 100-dən çox ölkəni təmsil edən 700-dək boksçunun iştirakı gözlənilən bu mundialda öz çərisinin qalibi olan boksçular qızıl medalla yanaşı, həm də 200 min dollar mükafata sahib olacaqlar. İkinci yerin sahibi 100 min, üçüncü yeri tutansa 50 min dollar qazanacaq. 

İNTİQAM Məmmədov