GÜLƏŞ
-------------------------
Finala çıxan bütün "klassiklər"imiz məğlub olublar
Eldəniz Əzizli çempionluq titulunu qoruya bilməyib

Aprelin 17-də Zaqrebdə (Xorvatiya) sərbəst güləşçilərin çıxışı ilə start götürən güləş üzrə (hər 3 növdə) Avropa çempionatına bu gün "klassiklər"in medallar uğrundakı çıxışları ilə yekun vurulacaq. Dünən axşam saatlarında Azərbaycan yığmasının 3 üzvü - ikiqat Avropa çempionu Eldəniz Əzizli (55 kq),  Taleh Məmmədov (63 kq) və ən ağırımız olan Sabah Şəriəti (130 kq) çempionluq uğrunda final, daha bir təmsilçimiz - İslam Abbasov (87 kq) isə bürünc medal qarşılaşmasına çıxıb. Təəssüflər olsun olsun ki, pəhləvanlarımızın hamısı bu görüşdə məğlubiyyətlə üzləşib. Qeyd edək ki, 3-cü dəfə Avropanın ən güclüsü olmaq fürsətini qaçıran Əzizli finalda türkiyəli Adem Uzuna elə uzun hesabla da uduzuv - 3:11. Digər finalçılarımıza gəlincə, Məmmədov gürcüstanlı Leri Abuladzeyə 1:5, Şəriəti isə Riza Kayalpa (Türkiyə) 1:2 hesabla məğlub olub. Bürünc medal görüşünə çıxan Abbasov isə gürcüstanlı Laşe Qobadzeylə bacarmayıb - 0:3. 
Bununla da yunan-Roma güləşi üzrə yığmamız çempionatın 6-cı günü 3 gümüş medalla kifayətlənib. Bu gün isə daha iki güləşçimiz - Həsrət Cəfərov (67 kq) və Ülvi Qənizadə (72 kq) çempionluq uğrunda final görüşünə cıxacaq. 60 kq-da çıxış edən Nihat Məmmədli və finalın bir addımlığında büdrəyən ikiqat Avropa çempionu Rafiq Hüseynovsa (82 kq) bürünc medal uğrunda güləşəcək.
Hazırda Azərbaycan yığmasının aktivində 11 (3-6-2) medal var. Xatırladaq ki, Əliabbas Rzazadə (57 kq), Hacı Əliyev (70 kq) və Mariya Stadnik (50 kq) çempion olaraq qızıl, həlledici finalda büdrəyən Osman Nurmaqomedov (92 kq), Maqomedxan Maqomedov (97 kq, hər ikisi sərbəst güləş), Jalə Əliyeva (57 kq, qadın güləşi). Eldəniz Əzizli (55 kq). Taleh Məmmədov (63 kq) və Sabah Şəriəti (130 kq, haçısı yunan-Roma) gümüş, Abubəkr Abakarovla (86 kq) Qeorqiy Meşvildişvili (125 kq, hər ikisi sərbəst güləş) isə bürünc medal qazanıb. 
Bu gün isə "klassiklər"imizin ən pis halda daha iki gümüş medal qazanacağı bəllidir. 
İNTİQAM Məmmədov