Lənkəranda yerləşən “Maarifpərvərlik” Azərbaycan Gənclərinin İctimai Yardım Assosiasiyası (MAGİYA) ictimai birliyi tərəfindən Lənkəranda “Gender əsaslı zorakılıq və məişət zorakılığına qarşı ictimai mübarizə” adlı ölkə əhəmiyyətli layihənin həyata keçirilməsinə başlanılmışdır. Layihə Azərbaycan Respublikasının Gənclər Fondunun 8500 (səkkiz min beş yüz) manatlıq maliyyə dəstəyi ilə həyata keçirilir.    

Layihənin məqsədi respublikamızda nikahların azalmasına, boşanmaların isə artmasına rəvac verən gender əsaslı zorakılığa və məişət zorakılığına qarşı ictimai mübarizə sahəsində gənclərin, xüsusən də, yeni ailə quran gənc ailələrin ölkə miqyasında maarifləndirilməsini və məlumatlandırılmasını təşkil etməkdən ibarətdir.

Layihənin müddəti 3 ay olmaqla, 20 dekabr 2022-ci il – 20 mart 2023-cü il tarixlərini əhatə edəcəkdir. Layihə çərçivəsində coğrafi və gender balans nəzərə alınmaqla, ölkə üzrə 18-35 yaş arası 25 nəfər gənc və gənc ailə təmsilçisi seçilərək onlar üçün gender əsaslı zorakılıq və ailədaxili zorakılıq mövzusunda Lənkəran şəhərində yerləşən “Lüks Lənkəran” otelində 17-19 fevral tarixlərində 3 günlük nəzəri-praktik konfrans təşkil olunacaqdır.

Məlumat üçün bildirək ki, konfransda iştirak etmək istəyən gənclər MAGİYA ictimai birliyinin www.epsaya.az adlı internet səhifəsinin “Yeniliklər” bölümünün “Elanlar” hissəsində  yerləşdirilən müvafiq elektron ərizə formasını (https://docs.google.com/forms/d/e/1FAIpQLSexZPWehkMDbFIemY4rpY7PbkD5NvXxLg85jQzrFBU5kUeq0A/viewform) 05 fevral 2023-cü il, Saat 24.00-adək dolğun formada doldurub göndərməlidirlər.

Əlavə edək ki, 3 günlük tədbir zamanı nəqliyyat xərcləri istisna olmaqla, bütün iştirakçıların çay-kofe, yemək və oteldə qalmaq xərcləri (3 gecə) layihə çərçivəsində MAGİYA ictimai birliyi tərəfindən ödəniləcəkdir.