Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin M.Ş.Vazeh adına Mərkəzi Kitabxanasının Fəxri oxucusu, AYB-nin üzvü, “Ömür axarı”, “Vətənsevər” və s. kitabların müəllifi, yazıçı-publisist, şair Bədirə Rza Həsənqızı Vətən müharibəsi şəhidlərinə silsilə şeir, hekayə, oçerk və esselər həsr edib. O, bu istiqamətdə işini davam etməkdədir.

Yazıçı-publisist, şair Bədirə Rza Həsənqızı Neftçala rayonunda anadan olan Azərbaycanın Daxili İşlər Nazirliyinin Daxili Qoşunlarının baş çavuşu, Vətən müharibəsi şəhidi Şahlar Məmmədovun əziz xatirəsinə “Vətəndə əbədi yaşarsan, Şahlar!” adlı şeirini kitabxanada həyata keçirilən “Şəhidlər ölməz, Vətən bölünməz!” layihəsinə təqdim etdi.
Şahlar Məmmədov Füzulinin, Cəbrayılın, Qubadlının, Zəngilanın və Şuşanın azadlığı uğrunda gedən döyüşlərdə savaşıb, noyabrın 7-də Şuşa döyüşləri zamanı şəhid olub.
Şəhid ölümündən sonra "Vətən uğrunda" və "Şuşanın azad olunmasına görə" medalları ilə təltif olunub.
Şair şeirdə şəhidin qəhrəmanlığını, qorxmazlığını, Vətəninə tükənməz sevgisini təsvir edir.
Şeir və videoçarx kitabxana tərəfindən oxuculara təqdim olunur.
 

Vətəndə əbədi yaşarsan, Şahlar!

Vətən! Sən  müqəddəs  qalamsan  mənim,
 Neçə  sevgilərin  növrağı  sənsən... 
Yolunda can  fəda  edir oğullar
Onların  ən  şirin  sorağı  sənsən! 

Çəmənin  çiçəyi  fərqli, rəngarəng –
Tükənməz sevgidir bülbülün səsi... 
Şuşa qalasında yüksəlir “AZAN” – 
Onun dayağıdır Şəhid nəfəsi!
Şəhidlər bu yurdun şərəfi, şanı, 
Ölməzlik, rəşadət ömür  yoludur...
 Şahlartək övladı  olan torpağın – 
Özü əbədiyyət, adı uludur!

Şahlar oğul  idi igid, qorxusuz, 
Onun andı idi – “Vətən  yaşasın!” 
Düşmənin səngərin yarıb keçirdi
Şuşada bayrağım  zirvəyə qalxsın! 

O, cəngavər idi, öz  libasında, 
Zamanın nəbzini çəkmişdi  geri... 
Şahlar elə ömür yazıbdı  ada –
 Qəhrəmanlıq  rəmzi – Şəhiddir  diri!

 Boylanıb  yoluna baş  əyirik  biz, 
Sən  örnək yolusan, Zəfərsən,  Şahlar! 
Sevgin könüllərdə, adın  dillərdə –
Vətəndə  əbədi  yaşarsan, Şahlar!