Gənclər üçün Təhsil Mərkəzinin (GTM) Qarabağ Regional ofisində baharın gəlişi və təbiətin oyanması ilə simvolizə olunan Novruz bayramı münasibətilə mərkəzin bir qrup əməkdaş və könüllüləri tərəfindən ölkəmizin ərazi bütövlüyü uğrunda gedən döyüşlərdə qəhrəmancasına şəhid olmuş Hüseynov Ceyhun Möhübbət oğlu və Piriyev Elsevər Mahir oğlunun ailələri ziyarət olunub və bayram xonçaları təqdim edilib

AZpress.AZ-ın bölgə müxbiri xəbər verir ki, görüş zamanı mərkəzin əməkdaşı Ülviyyə Qasımova şəhid ailələrini bayram münasibətilə təbrik edib və qeyd edib ki, şəhidlərimiz və qazilərimiz tarixi Zəfərimizin qəhrəmanları olaraq bizim üçün hər zaman əzizdir, onların həyat yolu gənclərimiz üçün vətənpərvəlik məktəbidir. Xalqımızın qalibiyyət ovqatını bütün varlığı ilə yaşadığı Novruz bayramı münasibəti ilə bir daha Vətənimizin ərazi bütövlüyünün bərpası naminə canlarını fəda etmiş qəhrəman övladlarımıza Allahdan rəhmət diləyir, onların əziz xatirəsini dərin ehtiramla yad edir, qazilərimizə şəfa arzulayırıq. 

Eyni zamanda şəhid ailə üzvlərinin xatirələri dinlənilib, Vətənimizin bütövlüyü uğrunda şəhidlik zirvəsinə ucalmış övladlarımızın hünərləri barədə danışılıb. Ailə üzvləri ilə söhbət zamanı müzəffər Ali Baş Komandan İlham Əliyevin rəhbərliyi altında Vətən müharibəsindəki tarixi qələbəmizdən bəhs edilib, rəşadətli ordumuzun işğaldakı torpaqlarımızın azad edilməsində göstərdiyi misilsiz qəhrəmanlığından danışılıb. 

Görüş iştirakçıları hər bir şəhid ailəsinin əziz olduğunu, onlara diqqət göstərməyin hamının mənəvi borcu olduğunu qeyd ediblər. Şəhid ailələri onlara göstərilən yüksək diqqət və qayğıya görə öz minnətdarlıqlarını ifadə ediblər.