BMA-da 8 noyabr Qələbə günü ilə bağlı konfrans tədbir keçirildi

01 noyabr 2023-cü il tarixində Üzeyir Hacıbəyli adına Bakı Musiqi Akademiyasının Q.Qarayev adına Konfrans zalında 8 noyabr Qələbə günü ilə bağlı konfrans tədbir keçirildi. Tələbə Elmi Cəmiyyətinin sədri, sənətşünaslıq üzrə fəlsəfə doktoru Minaxanım Babayevanın təşkilatçılığı ilə keçirilən  konfransda “Tarix -nəzəriyyə” fakültəsinin 3-cü və 4-cü kurs tələbələri, eləcə də Azərbaycan Milli Konservatoriyasının tələbələri  maraqlı proqramla çıxış etdilər. Zəfər Günü bizim Qarabağımıza qovuşduğumuz tarixi bir gündür.  Azərbaycanın ərazi bütövlüyünün təmin edilməsi uğrunda ulu öndərimiz Heydər Əliyevin başlatdığı mübarizə layiqli şəkildə Ali Baş Komandanımız İlham Əliyevin və müzəffər Azərbaycan ordusunun parlaq zəfəri ilə sona çatdı. Qarabağın düşmən tapdağından qurtulması ilə nəticələnən Vətən müharibəsi tariximizin ən parlaq səhifəsidir. Məhz bu mövzularla BMA-nın Tarix-Nəzəriyyə fakültəsində təhsil alan  Aytac Vəliyeva, Aydan Şərifova, Humay Kazımova, Aynur Hüseynli, Aytac Eyvazova, Esmira Qurbanova, Ləman Abulzadə, Mustafayeva Neyjən, Rəhimova Nərmin, Qasımova Aytən, Kazımzadə Gülnur çıxış etdilər. Eyni zamanda AMK-nın tələbələri   Nuray Hacızadə (1-ci kurs xanəndə), Əli Rüstəmbəyli (2-ci  kurs kamança), Cavanşir Rüstəmbəyli  (4-cü kurs tar), Lazım Ağayev (2-ci kurs nağara) Qarabağ şikəstəsini ifa etdilər. Tədbirdə AMK-nın TEC-nin sədri Fərdin Məmmədli musiqisi Səyavuş Kərimiyə aid “Ömrümün qisməti” kompozisiyasını Minaxanım Babayeva ilə birlikdə ifa etdilər. BMA-nın tələbələri Qarabağın tarixi, musiqiçiləri, görkəmli şəxsiyyətləri haqqında geniş məlumat verdilər. Musiqişünaslıq, bəstəkarlıq ixtisasında oxuyan tələbələr A.Əlizadənin “Ana torpaq” və M.Maqomayevin “Azərbaycan” əsərlərini xorla ifa etdilər. Bütün çıxışlar maraqlı slaydların müşayiəti ilə təqdim edildi. Xocalı soyqırımı ilə bağlı maraqlı video yayımlandı. Tədbirin sonunda Ü.Hacıbəyli adına Bakı Musiqi Akademiyasının Tədris işləri üzrə prorektoru, professor Nərminə xanım Quliyeva Qələbə bayramı münasibəti ilə təbrik etdi. Tədbir tamaşaçıların böyük marağına səbəb oldu.