"Mənim ağ göyərçinim" kitabının təqdimatı mərasimi keçirilib

Sentyabrın 30-u qəhrəman şəhidlərimizdən İsrayıl Cəfərzadənin doğum günü idi. Bu ilin həmin günu şəhidin xatirəsinə həsr olunmuş kitablardan daha biri oxucuların ixtiyarına verilib.
Sentyabrın 30-u şəhidin doğmaları və sevənləri məzarını ziyarət edib, daha sonra isə Sabunçu Gənclər evinə üz tutublar. Tədbirdə şəhid ailələri, qazilər, MCP-nin "Şəhid ailələri və qazilərlə iş" sektorunun müdiri şairə Esmira Günəş, "Xan qızı Natəvan" ədəbi məclisinin üzvləri, müəllimlər və şagirdlər, eləcə də şəhidin doğmaları iştirak ediblər. Tədbir Respublikamızın Himni və şəhidlərin bir dəqiqəlik sükütü ilə açıq elan olunduqdan sonra qonaqların çıxışları ilə davam edib.
Kitabın müəllifi "Xan qızı Natəvan" ədəbi məclisinin rəhbəri Rəna Mərzili tədbirdə çıxış edərkən bildirib ki, İsrayıl haqqında belə bir kitabın ərsəyə gəlməsi şəhidimizin anası Kəmalə xanımın arzusu olub. 
Şairə Esmira Günəş isə tədbirdə Millət Vəkili Razi Nurullayevin nümayəndəsi olaraq çıxış edərək, şəhid ailəsinə səbr diləyib, ən yaxın zamanda partiyanın üzvləriylə birlikdə şəhidimizin ev muzeyini də ziyarət edəcəklərini bildirib.
Tədbirin sonunda qonaqlara "Mənim ağ göyərçinim" kitabı hədiyyə olunaraq xatirə şəkilləri çəkdirilib.