“Kitabxanaya kitab hədiyyə edirik” layihəsinə yeni kitab hədiyyə olundu

Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanasında həyata keçirilən “Kitabxanaya kitab hədiyyə edirik” layihəsinə AYB-nin və AJB-nin üzvü, şair-publisist Pərixanım Mikayılqızı (Muradova) yeni nəşr olunmuş “Klassik irsimizin zərif nümayəndələri” kitabını hədiyyə etdi.
Pərixanım Mikayılqızı “Klassik irsimizin zərif nümayəndələri” kitabını Azərbaycanın ictimai, siyasi və mədəni həyatında yer tutan yaradıcı, mübariz qadınlarımıza həsr edib. Kitabda klassik irsimizin qadınları haqqındakı yazılar müxtəlif dövrləri əhatə etsə də, hər birinin tale oxşarlığında eynilik vardır. Müəllif bu kitabı klassik ədəbiyyatımızın ilk qadın şairlərindən hesab edilən Məhsəti xanım Gəncəvidən başlayaraq müxtəlif əsrlərdə yaşayıb-yaratmış, öz sözünü demiş bir sıra maarifpərvər qadınlar haqqında materiallar toplayaraq qələmə almış və sonunu Əzizə xanım Cəfərzadə ilə yekunlaşdırmışdır.
Müəllif sayca yeddinci kitabı olan bu əsərin üzərində altı ilə yaxın zəhmət çəkmişdir. Kitabda müəllifin müxtəlif jurnallarda və qəzetlərdə çap olunmuş məqalələri ilə yanaşı çap olunmayan yazıları da yer alıbdır. “Klassik irsimizin zərif nümayəndələri” kitabı geniş oxucu kütləsi üçün nəzərdə tutulmuşdur.    
Kitaba ön sözü filologiya elmləri doktoru, dosent, AMEA-nın Nizami Gəncəvi adına Ədəbiyyat İnstitutunun baş elmi işçisi, AYB-nin üzvü Mərziyə Nəcəfova yazıb.
Pərixanım Mikayılqızının “Klassik irsimizin zərif nümayəndələri” Kitabı ilə Yasamal rayon MKS-nin kitabxanalarında tanış olmaq olar.