BMA-da ustad dərsi keçirildi

19 sentyabr 2023-cü il tarixində Üzeyir Hacıbəyli adına Bakı Musiqi Akademiyasının Kiçik zalında Miçiqan Universitetinin professoru  İqor Fedotovun BMA-nın  tələbələri ilə ustad dərs keçirilmişdir.

Ustad dərsə başlamadan öncə Əməkdar incəsənət xadimi, “İfaçılıq” fakültəsinin dekanı professor Nəzmiyyə Abbaszadə qonaqları salamlayaraq, professor İqor Fedotovu hər kəsə təqdim etdi. Nəzmiyyə xanım İ.Fedotovun pedaqoji fəaliyyətinin Bakı Musiqi Akademiyası ilə də bağlı olduğunu vurğuladı.

Üzeyir Hacıbəyli adına Bakı Musiqi Akademiyasının professor, müəllim və tələbə heyətinin iştirakı ilə keçirilən ustad 

dərs zamanı BMA-nın tələbələri Əli Əmişov (viola, magistr I kurs),  Humay Hacızadə (viola, bakalavr  IV kurs), Şəms Əlili (viola, bakalavr  I kurs) iştirak edərək İ.S.Bach: Suite no.3, Allemande, C.Stamitz: Viola Concerto in D major, Op.1  ( 1st movement) və İ.S.Bach: Suite no.2 Courante and Sarabande əsərlərini ifa etdilər.

Ustad dərs zamanı professor  İqor Fedotov tələbələrlə ifaçılıq sənətinin sirrlərini bölüşmüş, öz bilik və təcrübəsini  bölüşərək, əsərlər üzərində texniki bacarıq qaydalarını  izah etmiş, texniki çətinliklərin necə aradan qaldırılması yollarını göstərmişdir. 

Üzeyir Hacıbəyli adına Bakı Musiqi Akademiyasında keçirilən növbəti ustad dərs tələbələr tərəfindən rəğbətlə qarşılanmışdır.