Elçin Mirzəbəyli: 

“İlan ulduz görməsə ölməz”

Çox güman ki, bəşər tarixi ermənilər qədər, əsasən qeyri-adekvat, düşüncələrində və davranışlarında məntiqi ardıcıllıqdan əsər-əlamət olmayan toplumla qarşılaşmayıb. Hər dəfə Ermənistan siyasətçiləri və ekspertləri, separatçılar və erməni diasporunun ultraradikal təmsilçiləri də daxil olmaqla bu toplumu təmsil edən şəxslərin bir-biri ilə yaxından-uzağa əlaqəsi olmayan, ziddiyətli fikirləri ilə tanış olanda bir anlığa gözlərimlə, qulaqlarımla beynim arasındakı əlaqə tamamilə itir. Mənə elə gəlir ki, ermənilərdən öz məqsədləri üçün istifadə edənlərdən başqa, hər kəs mənimlə aşağı-yuxarı eyni durumu yaşayır. Ermənilərdən və “erməni məsələsi”ndən öz məqsədləri üçün istifadə edənlərə gəldikdə isə, qənaətimə görə, heç onlar da bu toplumun təmsilçilərinin bir-biri ilə əlaqəsi, məntiqi bağı olmayan mülahizələrini başa düşmürlər. Çox güman ki, belə bir niyyətləri də yoxdur.

...Separatçıbaşı Araik Arutunyanın son rabitəsiz nitqi ilə tanış olduğum zaman, yenə də eyni, izahını verə bilmədiyim vəziyyətlə qarşılaşdım və artıq çıxış yolu axtarmağa da çalışmıram...

Deməli, bütün rabitəsiz nitqi boyu “müstəqillik”dən dəm vuran Araik deyir ki, onlar - separtçılar hər ay Ermənistanın Maliyyə nazirliyinə hesabat verirlər. Vəssalam! Təkcə bu fakt yetərlidir ki, Azərbaycan ərazilərində yaşayan separatçı rejimin Ermənistandan idarə olunduğunu və rəsmi İrəvana tabe olduğunu müəyyənləşdirəsən. Bu məxluqat, bütün bunlardan sonra deyir ki, rəsmi Bakı danışıqları İrəvanla deyil, “Xankəndi ilə aparmalıdır”. Niyə? Bütün dünyanın Azərbaycan ərazisi kimi tanıdığı Qarabağ iqtisadi rayonunun bir hissəsində, vaxtilə Ermənistanın işğalı nəticəsində formalaşdırılmış və hələ də mövcudluğunu İrəvandan ayrılan maliyyə vəsaitlərinin hesabına qoruyub-saxlayan qanunsuz, qondarma və müharibə cinayətkarlarından ibarət rejimi, rəsmi Bakı hansı hüquqi, siyasi və tarixi reallıqlara, həmçinin hansı məntiqə uyğun olaraq, “tərəf” kimi tanımalıdır? Bu məxluqat bir tərəfdən deyir ki, “Ermənistana hesabat verirəm”, yəni “İrəvanın tapşırıqlarını yerinə yetirirəm, yalım ordan gəlir”, digər tərəfdən isə “müstəqillik”dən dəm vurur...

Arutunyan daha sonra deyir ki, onlar – Azərbaycandakı erməni azlığın təmsilçiləri Qarabağda yaşamaqla, anaları Ermənistana, diaspora borclarını qaytarırlar, onlara ötürülən vəsaitləri bu yolla kompensasiya edirlər. Bu isə o deməkdir ki, Ermənistan və diaspor Azərbaycan ərazisindəki erməniləri separatizmə təhrik edir, ölkəmizə qarşı ərazi iddialarını gerçəkləşdirmələri üçün onlara vəsait ayırır və onlar da verilən tapşırıqları icra etməklə “borclarını qaytarırlar”. Bundan daha açıq etiraf olur məgər?

Bütün bunlar Azərbaycanın Laçın yolu ilə bağlı atdığı legitim addımların, qanuni olmaqla yanaşı, həm də zəruriliyini sübuta yetirir.

Elimizdə məşhur bir məsəl var: “İlan ulduz görməsə ölməz”. “İlan”a “ulduz”u göstərmək lazımdır. Həm də daha aydın və daha qabarıq şəkildə...

Elçin Mirzəbəyli