Kitabxanaya Vətənə həsr olunmuş yeni şeirlər təqdim olundu

Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanasının Fəxri oxucuları şairlər, yazıçılar yeni əsərlərini mütamadi olaraq kitabxanada həyata keçirilən “Yaradıcı oxucularımız” layihəsinə təqdim edirlər.
     Növbəti dəfə yazıçı-publisist, şair Gülarə Munis  kitabxanaya yeni yazdığı şeirlərini təqdim etdi. “Vətən eşqi, Vətən yanğısı...” və “Azərbaycanım” şeirlərdə müəllif ürəyimizin döyüntüsü, qəlbimizin harayı, arzularımızın ünvanı Vətənimizi, əbədi müstəqil Azərbaycanımızı tərənnüm edir.
                       Vətən eşqi, Vətən yanğısı...

Vətən! Haradandır səndə bu qədər cazibə, bu qədər ecaskarlıq?
Haradandır bu qədər ürək yandıran istək, sevgi?
Canımızın cövhəri, qolumuzun gücü, dizimizin təpəri, Vətən...
Ürəyimizin döyüntüsü, qəlbimizin harayı, arzularımızın ünvanı, Vətən.
Adının sonunda bir “can” kəlməsi var, bəlkə ona görə bizə canımızdan əzizsən...
Bəlkə ona görə sənin yolunda canını qurban verənlər “uf” da demir...
Bəlkə ona görə qanımız, canımızla sənə bağlıyıq?
Azərbaycanımız!!!

                                   Azərbaycanım

                                        
Gözümün işığı, ziyası Vətən,
Ərən oğulların qalası Vətən,
Sənsən övladımın anası, Vətən,
Sən əzəl beşiyim, sən son məkanım – 
Əbədi müstəqil Azərbaycanım.

Gülünün min rəngi, min çaları var,
Ürəyi yaralı  Şəhriyarı var,
Sabiri, Cavidi, Bəxtiyarı var,
Göygöl görən gözüm, Xəzər ümmanım,
Əbədi müstəqil Azərbaycanım.

Sən elə müdriksən cavan yaşında,
Min tarix yaşayır qara daşında.
Nələr həkk olunub qan yaddaşında...
Qarabağ ürəyim, Kür-Araz qanım,
Əbədi müstəqil Azərbaycanım.

Müzəffər ordumuz qazandı  zəfər,
Saplandı düşmənin köksünə xəncər,
Bir “Cəngi” çalındı, yayıldı xəbər:
“Qələbə qazandı Azərbaycanım!”
Əbədi müstəqil Azərbaycanım!