Bəybala Mirzəyev:

 Zəifləyərkən quduzlaşan imperiyanın vitse-spikerindən şok fikirlər...

Rusiya Dövlət Dumasının sədr müavini Pyotr Tolstoy son açıqlamasında Rusiyanın gerçək simasını açıb ortaya qoyub, Kremlin postsovet respublikalarına, o cümlədən Azərbaycana qarşı neoimperialist, şovinist-işğalçı planlarını faş edib.

Bizim iqtidaryönlü media və ekspertlərimiz qeyd edirlər ki, P.Tolstoy Azərbaycan-Rusiya əlaqələrinə kölgə salan açıqlama verib.

Ancaq bu məsələyə görə biz yox, ilk növbədə Rusiya tərəfi narahat olmalıdır ki, bu dövlətin vacib fiqurlarından biri olan P.Tolstoy Azərbaycan-Rusiya əlaqələrinə kölgə salan açıqlama ilə çıxış edib. Lakin Rusiya tərəfi narahat olan deyil. Çünki Tolstoy əslində öz şəxsi mövqeyini yox, Kremlin mövqeyini ifadə edib, Rusiya Dövlət Dumasının sədr müavini kimi çıxış edib.

Yəni ki, bilməliyik ki, bu gün yalnız Pyotr Tolstoy yox, Rusiyanın hazırkı hakim elitasında təmsil olunan əksər şəxslər (nazirlər, deputatlar, müşavirlər) postsovet ölkələrinə münasibətdə eyni düşüncəni bölüşürlər. Çünki Putinin özü də bu düşüncəyə sahibdir.

Məhz Putin dəfələrlə öz çıxışlarında keçmiş SSRİ-nin dağılmasını "geosiyasət fəlakət" kimi dəyərləndirib və sovet imperiyasını yenidən bərpa etmək niyyətlərini heç vaxt gizlətməyib.

Və bu gün Tolstoy, Zatulin, Slutski, Milonov, Artamonov, Yevseyev və s. kimi şovinist ünsürlər də öz təxribatçı çıxışlarında məhz Putinin arzularını, onun köhnə-yeni geosiyasi planlarını dilə gətirirlər.

Yeri gəlmişkən, P.Tolstoy bunları deyib:

"Rusiya aparıcı dünya dövləti mövqeyinə malikdir, əvvəllər onun tərkibində olan ölkələr ondan asılı idi və bundan sonra da belə olacaq. Azərbaycan, Ermənistan və Ukrayna hansısa məqamda qərara gəldilər ki, onların başqa geosiyasi vektorlara, istiqamətlərə də üz tutmaq imkanı var. Lakin iqtisadi, siyasi, coğrafi və tarixi baxımdan bu ölkələr üçün Rusiyadan başqa istiqamət yoxdur. Rusiya bu ərazilərdə sakitləşdirmə və nizam-intizam yaratmaq siyasəti aparır. Rusiya olmadan nə Ermənistan, nə Azərbaycan, nə "Dağlıq Qarabağ", nə də Ukrayna mövcud olacaq. Burada vacib olan budur. Qalan hər şey bu anlayışa əsaslanaraq nəticə verəcək”.

Gördüyümüz kimi Rusiyanın təxribatçı vitse-spikeri Azərbaycan əleyhinə danışmağı azmış kimi, üstəgəl Azərbaycanın tərkib hissəsi olan Qarabağı da "Dağlıq Qarabağ" adı altında ayrıca təqdim edib. Və çox güman ki, bunu da qəsdən edib.

P.S. Gün-gündən zəifləməkdə olan Rusiya imperiyası gücdən düşdükcə daha da quduzlaşır və qonşu xalqlara qarşı açıq aqressiya mövqeyinə keçir.

Dərd burasındadır ki, Rusiya güclənəndə də, zəifləyəndə də həddindən artıq təhlükəli olur.

Bu mənada, Tolstoyun fikirləri bütün postsovet ölkələrini ciddi şəkildə düşündürməlidir. Bu dəfə hamı Rusiyanın əlinin altında yox, hamı Rusiyaya qarşı birləşməlidir.