Bəybala Mirzəyev:
REAL-ı nə gözləyir?
Ölkədə fəaliyyət göstərən 59 partiyaya "Siyasi partiyalar haqqında" yeni qanunun tələbinə görə iyulun 10-na qədər vaxt verilmişdi ki, yenidən qeydiyyata alınmaları üçün üzvlərinin reyestr məlumatlarını Ədliyyə Nazirliyinə (ƏN) təqdim etsinlər.
Hər bir partiya minimum 5 min nəfər üzvün reyestr məlumatlarını sözügedən nazirliyə təqdim etməliydi. Bu məlumatları təqdim edə bilməyən 31 partiya artıq bağlanıb.
REAL Partiyası isə bu yaxınlarda 5 min üzvü haqda məlumatları nazirliyə təqdim etmişdi. Və ötən gün Ədliyyə Nazirliyindən REAL partiyasının qeydiyyatla bağlı müraciətinə cavab verilib.
Partiyanın sədri İlqar Məmmədov nazirliyin həmin üzvlərlə bağlı təqdim etdikləri siyahı üzrə araşdırma apardığını bildirib.
İlqar Məmmədov təqdim etdikləri siyahının nazirlik tərəfindən qəbul edilmədiyini və siyahının yenidən tərtib edilməsi üçün partiyaya 30 gün vaxt verildiyini açıqlayıb.
Açıqlamada olduqca maraqlı məqamlar var.
Məlum olub ki, REAL-ın nazirliyə təqdim etdiyi siyahıda adları yer alan şəxslərin bəziləri ümumiyyətlə o partiyanın üzvü deyil, bəziləri isə dünyasını dəyişib.
İ.Məmmədovun açıqlaması:
“Ədliyyə Nazirliyindən rəsmi cavab aldıq. Deyir, reyestrdə adlarını göstərdiyiniz üzvlərlə əlaqə saxladıq. 986 nəfər partiyaya üzv olmadığını bildirdi. Daha 1058 nəfərin telefon nömrəsi kimi ofisin nömrəsi göstərilib, bunu isə məqbul saymırlar. 2527 nəfər barədə məlumatlar (adı, soyadı, doğum tarixi) Əhalinin Dövlət Reyestrində tapılmadı (yəqin hərf səhvi kimi səbəblərə görə). Nəhayət, 68 nəfərin adı təkrar gedib, 16 nəfər isə ölüb. Beləliklə, partiyamızın siyahısında cəmi 463 nəfərin adı “keçərli” oldu.
Qanuna əsasən, növbəti 30 gün ərzində, ya 4500+ nəfərin məlumatlarını “düzəltməli”, ya eyni qədər yeni üzv toplamalı, ya da partiyanı buraxmalıyıq”.
Belə çıxır ki, REAL-ın üzvləri qeyri-realdır? İlqar Məmmədov belə düşünmür.
Lakin hər bir halda, bir partiyanın 5 min nəfərlik siyahısından 986 nəfəri partiyaya üzv olmadığını bildirirsə və 16 nəfərin isə həyatda olmadığı məlum olursa, bu, əlbəttə, heç də ürəkaçan mənzərə deyil.
Ötən 6 ay ərzində bu qədər üzv toplamaq və onların reyestr məlumatlarını qüsursuz formada tərtib edib nazirliyə təqdim etmək, zənnimcə, mümkün idi.
Ancaq REAL-ın 30 günə 4500+ yeni üzv toplaya biləcəyi isə bəlli deyil.
Bu arada İlqar Məmmədovun məsələyə reaksiyası da olduqca maraqlıdır. Təbii ki, o, ƏN-in bu mövqeyi, bu rəyi ilə razılaşmır və hesab edir ki, onların təqdim etdiyi siyahıda bu qədər əyər-əskikliklər ola bilməz.
İ.Məmmədovun fikrincə, iqtidar REAL-ın qarşıdan gələn parlament, prezident və bələdiyyə seçkilərində iştirak etməyini istəmədiyinə görə partiyanın təqdim etdiyi siyahını yararsız elan edib.
Maraqlıdır, hakimiyyət REAL Partiyasının sözügedən seçkilərdə iştirakını nədən istəməsin ki?
Axı son vaxtlar (son 2-3 ildə) hakimiyyətlə REAL arasında normal münasibətlər yaranmışdı. İlqar Məmmədov dövlət rəsmiləri ilə görüşürdü, PA-nın (Prezident Administrasiyası) işğaldan azad edilmiş ərazilərə təşkil etdiyi partiya sədrlərinin birgə səfərlərinə qatılırdı, hətta AzTV-nin verilişlərində də iştirak edirdi. Üstəgəl, REAL-ın əsas simalarından biri sayılan Erkin Qədirli də Milli Məclisdə təmsil olunur.
Bütün bunların fonunda, indi birdən-birə nə baş verib ki, iqtidar REAL-ın təkrar qeydiyyata alınmasından vaz keçmək istəyir?
Bildiyim qədərilə elə bir ciddi hadisə baş verməyib. REAL-ın təqdim etdiyi siyahının ƏN tərəfindən qəbul edilməməsi və siyahının yenidən tərtib edilməsi üçün partiyaya 30 gün vaxt verilməsi adi prosedur qaydadır. Belə bir hal ilə istənilən digər partiya da üzləşə bilər. O biri partiyaların da ƏN-ə təqdim etdikləri analoji siyahılarda eyni boşluqların, əyər-əskikliklərin ortaya çıxması mümkündür.
Ona görə də REAL ona verilən 30 gün vaxtdan maksimum səmərəli istifadə edib üzvlərinin siyahısını qaydaya salmalı və ƏN-ə təqdim etməlidir. Böyük ehtimalla REAL-ı qeydə alacaqlar. Məncə, iqtidar konstruktiv müxalifət hesab etdiyi REAL Partiyasının bağlanmasını əsla istəməz.
(Ardı var)
Bu silsilədən olan yazıların əvvəli burada: https://www.facebook.com/beybala.mirzeyev/posts/pfbid08zTSYzzUF4obvcT76uN3fzy1yva8pVvo165GPxCfNii5GKt1i571Y6EiE15mFxsXl
03 Comments
High Life tempor retro Truffaut. Tofu mixtape twee, assumenda quinoa flexitarian aesthetic artisan vinyl pug. Chambray et Carles Thundercats cardigan actually, magna bicycle rights.
Farm-to-table selfies labore, leggings cupidatat sunt taxidermy umami fanny pack typewriter hoodie art party voluptate cardigan banjo.
VHS Wes Anderson Banksy food truck vero. Farm-to-table selfies labore, leggings cupidatat sunt taxidermy umami fanny pack typewriter hoodie art party voluptate cardigan banjo.