Bu gün aktual məsələlərdən birinə toxunmaq istərdim. Sosial şəbəkələr artıq günümüzün ayrılmaz hissəsinə çevrilib. Amma bunlardan ən məşhuru hal-hazırda "TikTok"dur. Burada həm pul qazanmaq, həm də sözün əsl mənasında özünü reklam etmək olur. Bəzən özüm də daxil oluram və mənə maraqlı gələn səhifələrə nəzər yetirirəm, hansı ki, maarifləndirici profillərdir. Buna baxmayaraq hamımız yaxşı bilirik ki, nəinki savadsız, təhsilsiz, hətta A ilə Z-ni ayıra bilməyənlər hamısı burada cəmləşməkdədir. Hər kəs müəyyən yollarla özünü reklam edərək pul qazanmaq niyyətindədir. Canlı yayım açaraq müəyyən hərəkətlər nümayiş etdirərək hədiyyələr qəbul edirlər. Cilddən cildə girənlər, danışıqlarına fikir verməyənlər, olduğu məkandan asılı olmayaraq canlı açanlar- hər kəs burada bir işlə məşğuldur. Son günlərdə isə qarşıma tez-tez çıxan "Təkər" şousu oldu. Məndə maraq yaratdığı üçün canlı yayımına daxil oldum. Və daxil olmağa da peşman oldum...Sözdə realiti şou adı altında özlərinə "blogger", "xeyriyyəçi", "fenomen" deyənləri proqrama dəvət ediblər. Ən maraqlısı da budur ki, canlı yayımda Azərbaycan tele-məkanında bəlkə də heç zaman olmamış hadisə baş verdi: 80 min insan canlıya qoşulmuşdu. Demək ki, insanlara burada yalnız şou maraqlıdır. Orada iştirak edənlərin nümayiş etdirdiyi performansları gördükdə dəhşətə gəlirdim. Ən azından danışıq mədəniyyəti deyilən söz birləşməsi var. Heç kəs bir-birini dinləmir, kimisi canlı efirdə telefonla danışır, kimisi danışığını bilməyərək mübahisə edirdi... Sadəcə olaraq kim çox səs, jeton yığdı o da sonda qalib olur. Bunun da etika ilə heç bir əlaqəsi yoxdur. Müəyyən telekanallar da bu vəziyyətdədir. Hərdən maraqlı veriliş olar deyə TV-ni açıram amma gördüyüm mənzərə ilə qarşılaşdıqda baxmasam yaxşıdır deyib çevirirəm. Efirə çıxmaq üçün dəridən-qabıqdan çıxmaqla kifayətlənməyərək, yenicə cücərmə yoluna istiqamətlənən "müğənnilər"i gördükdə beynimdə bir sual yaranır. Sırf qonorar üçün bu cür insanları efirə buraxmaq və cəmiyyətə bunu aşılamağa çalışan bəzi kanal rəhbərləri görəsən kənardan bütün olayları seyr edirlərmi? Bəzi aparıcıların efirdə geydiklərini gördükdə artıq sözə gərək qalmır. Bəzi aparıcı xanımların geyim tərzi ilə heç cür razılaşa bilmirəm. Bu efirdir. Azərbaycanın yarısı uşaqlı, böyüklü səni izləyir. Seçdikləri geyimi "dəb" adlandıraraq cəmiyyətə qəbul etdirməyə çalışırlar. Avropalaşmaq adı altında təbliğatla məşğuldurlar...  Əfusular olsun ki, bütün olaylar bununla kifayətlənmir. Şair adı ilə bir şəxs canlı efirə çıxır. Aparıcı ondan bir parça şeir deməsini xahiş edir. Diqqətlə nəzərimi şair deyilən şəxsə yönəldirəm. Ağzını açdığı anda onun şairliklə əlaqəsi olmayan digər peşənin sahibi olduğunu açıq şəkildə nümayiş etdirir. Verilişdə əyləşən qonaqların reaksiyaları da gözümdən qaçmırdı. Qonaqlar özünə şair deyilən şəxsi böyük bir həvəslə elə dinləyirlər ki, sanki Məhəmməd Füzuli "Mətləül-etiqad"ı söyləyir. Çox insan Füzulinin yaradıcılığını anlamayaraq çətin dildə yazır deyirlər. Amma efirlərdə, canlılarda söylənilən şeirləri gördükdə Füzuli mi qəlizdir yoxsa onlar mı deyə sual verirəm...

Azərbaycanda bəzi aktyor və aktrisalar var ki, bu gün də fəxri ada layiq görülməyib. Halbuki illərin korifey sənətkarlarıdırlar. Amma aktyorluq qabiliyyəti sıfıra bərabər olanlar isə hamısı gündəmdən düşmürlər. Ümumiyyətlə mən heç bir Azərbaycan serialına baxmıram. Sadəcə həyatım boyu yeganə azərbaycanlıların çəkdiyi serial olan "Vicdan haqqı"na çox az baxmışam. Demək olar ki, Azərbaycan tele-məkanında ən səs-küylü və reytinqli seriallrdan biri olmuşdur. Sonralar serialı analiz etməyə qərar verdim və belə anladım ki, adətən qadınların seyr etməkdə üstünlük təşkil etməsinin tək səbəbi var. Həmin səbəb də xəyanətlə əlaqədardır. Bəzi kişilər evli olsa belə digər bir qadınla vətəndaş nikahında yaşamağa üstünlük verirlər. Və yaxud yoldaşını atası evində qoyaraq özü sözdə işləmək məqsədilə Rusiyaya yollanır. Əminəm ki, çox Azərbaycan qadınlarının yaralı yeri məhz budur. Bunun  üçün də serial kifayət qədər tamaşaçı kütləsinə sahib idi. Filmdəki obrazlardan biri də məhz digər qadınla münasibət yaşayır və bütün hadisələr onun ətrafında cərəyan edir...Təəssüflər olsun ki, bu kimi problemlər illərdir aktual olmaqda davam edir...

Azərbaycan platformasında belə hadisələrin baş verməsi qəbuledilməzdir. Bəzi qadınlar boşanan kimi ya rəqqasəliyə baş vurur, ya da sosial şəbəkədə yeni profil yaradaraq kütləni özünə cəlb etməyə çalışır. Hətta tez-tez belə xəbərlərlə də rastlaşırq: Canlı yayımda oturaraq dövlət orqanlarında çalışan şəxsləri təhqir edirlər. Səhəri gün isə həmin şəxsin üzr videosu yayılır. Maraqlıdır ki, bunu deyən şəxs hadisənin belə nəticələnəcəyini bilmir mi? Və yaxud özlərinə bəraət qazandıraraq içkili olmuşam bəhanəsi ilə camaatı aldatmağa çalışırlar...Rus atalar sözlərində deyildiyi kimi: "Yalanla dünyanı gəzərsən, amma geri dönə bilməzsən". 

Sonda Vətənimdə xoş hadisələrin inkişaf və tərəqqisini izləmək və müşahidə etmək istərdim. Əminəm ki, tək mən yox, çox insan buna şahid olmaq istərdi...

Xeyransa İsmayıl