Rafael Hüseyn: DAHA BİR UĞURUMUZ 
Bu, ən əvvəl beşimizin uğuru və sevincidir: 
Filologiya elmimizin nailiyyəti - sıraya daha bir layiqli elmlər doktoru qatılır; 
Nizami muzeyinin müvəffəqiyyəti - daha bir doktorantımız alimlik diplomunu alır; 
Nizami muzeyindəki Dissertasiya Şurasının fəthi- yaxşı işimizin keyfiyyət göstəricisi olaraq daha bir təsdiq diplomu qazandıq;
İradə xanımın başarısı - illərlə çəkdiyi ağıl zəhmətinin bəhrəsini görür; 
Və mənim fərəhim - elmi məsləhətçisi olduğum daha bir cavan araşdırıcısı elmlər doktoru zirvəsini fəth edir. 
İradə Musayeva son illərdə Azərbaycan ədəbiyyatşünaslığında imzasının sanbalı və ciddiyyəti ilə seçilən araşdırıcılardandır.
Nizami Gəncəvi adına Milli Azərbaycan Ədəbiyyatı muzeyinin doktoranturasından keçərək elmi dərəcələr alanların sayı hər il artır və əsası odur ki, bu gənc alimlərin heç biri elmdə təsadüfi, müvəqqəti, kənar məqsədli deyildir. 
Bu yolu tutublarsa, axıracan gedəcəklər. 
İradə isə onalrın ən üstünlərindəndir.
Təbrik edir və böyük elmdə yeni uğurlar arzulayıram!
Ali Attestasiya Komissiyasına isə daha bir səviyyəli dissertasiyaya ədalətlə yanaşaraq ləngitmədən yol açdığı üçün ayrıca təşəkkürlər!

***   ***   ***

ŞƏRHLƏR:

Irade Musayeva
Hörmətli Rafael müəllim! Sizə və Nizami Gəncəvi adına Milli Azərbaycan Ədəbiyyatı muzeyinin dəyərli əməkdaşlarına təşəkkürümü bildirirəm. Mənim bu uğurumda sizin rəhbərlik etdiyiniz qurumun rolu çox böyük olmuşdur. Dürüstlük, dəqiqlik, tələbkarlıq və qayğı... Şərait yaradıldı və etimad göstərildi. Etimadı doğrultmamaq qəbahət olardı... Mənə yalnız yaradılmış şəraiti dəyərləndirmək qalırdı. Onu da bilirəm ki, bu cür imkan sizin rəhbərliyiniz və diqqətinizlə bütün doktorantlara yaradılır. Hər müdafiənin uğurlu nəticəsini - AAK-dan gələn diplomları başda siz olmaqla bütün muzey əməkdaşları fərəhlə qeyd edir... İndiki şəraitdə elm və ədəb mühiti kimi istisnalar arasında birinciliyi də məhz Nizami Gəncəvi adına Milli Azərbaycan Ədəbiyyatı muzeyi qoruyub saxlayır. Var olun, Siz muzeyin, eləcə də Azərbaycan elminin tarixində həm də bu cür xidmətlərinizlə yaşayacaqsınız...